ఒప్పో, రియల్ మీ, వన్ ప్లస్ వంటి ప్రముఖ మొబైల్ బ్రాండ్ల పేర్లతో నకిలీ ఫోన్లు, వాటి ఉపకరణాలు తయారు చేస్తున్న ముఠాను ఢిల్లీ పోలీసులు అరెస్ట్ చేశారు. ఈ ముఠా మోతీ నగర్ లో ఒక ఫ్యాక్టరీ ఏర్పాటు చేసి, దేశవ్యాప్తంగా ఈ నకిలీ ఉత్పత్తులను సరఫరా చేస్తున్నట్లు గుర్తించారు.
ఢిల్లీలోని కరోల్ బాగ్ ప్రాంతంలో నకిలీ మొబైల్ ఫోన్ల తయారీ జరుగుతోందన్న సమాచారం మేరకు పోలీసులు ఈ దాడులు నిర్వహించారు. మోతీ నగర్ లోని ఒక ఫ్యాక్టరీలో ఒప్పో, రియల్ మీ, వన్ ప్లస్ బ్రాండ్లకు చెందిన నకిలీ మొబైల్ ఫోన్లు, వాటి ఉపకరణాలను తయారు చేస్తున్నట్లు గుర్తించారు.
ఈ ముఠా సుమారు 8 మెషీన్లు, ఒక ప్రింటింగ్ మెషీన్ సహాయంతో చాలా కాలంగా ఈ అక్రమ వ్యాపారాన్ని నిర్వహిస్తున్నట్లు పోలీసులు తెలిపారు. దేశంలోని వివిధ ప్రాంతాలకు ఈ నకిలీ మొబైల్స్ ను సరఫరా చేస్తున్నట్లు గుర్తించారు. ఈ దందా వెనుక ఎవరున్నారు, వీరి సరఫరా వ్యవస్థపై పోలీసులు లోతుగా విచారణ జరుపుతున్నారు.
వినియోగదారులను అసలు ఫోన్ల పేరుతో మోసం చేస్తున్న ఈ ముఠా కార్యకలాపాలు వెలుగులోకి రావడంతో, అప్రమత్తత అవసరమని అధికారులు సూచిస్తున్నారు. తక్కువ ధరలకు లభించే ఫోన్ల విషయంలో జాగ్రత్త వహించాలని, తెలియని వ్యక్తుల వద్ద కొనుగోలు చేయవద్దని హెచ్చరికలు జారీ చేశారు.
ఈ నకిలీ ఉత్పత్తుల వల్ల వినియోగదారుల సొమ్ముతో పాటు, వారి భద్రత కూడా ప్రమాదంలో పడే అవకాశం ఉందని అధికారులు పేర్కొన్నారు. ఈ కేసులో మరిన్ని వివరాలు విచారణ అనంతరం వెల్లడయ్యే అవకాశం ఉంది.
