ఇరాన్ నుండి అమెరికాకు తీవ్ర హెచ్చరిక: విద్యుత్ కేంద్రాలపై దాడి చేస్తే హర్మూజ్ జలసంధి మూసివేత

ఇరాన్ రివల్యూషనరీ గార్డ్స్ (IRGC) ఒక సంచలన ప్రకటన చేస్తూ, అమెరికా తమ దేశంలోని విద్యుత్ కేంద్రాలపై దాడి చేయాలని చూస్తే, గల్ఫ్ దేశాల్లోని అమెరికా సైనిక స్థావరాలను లక్ష్యంగా చేసుకుని ప్రతిదాడి చేస్తామని తెలిపింది. అంతేకాకుండా, అమెరికా అనుబంధ ఐటీ వ్యవస్థలు, తాగునీటి శుద్ధి కేంద్రాలను కూడా ధ్వంసం చేస్తామని హెచ్చరించింది.

ప్రపంచ చమురు రవాణాకు కీలకమైన హర్మూజ్ జలసంధిని 48 గంటల్లోగా తెరవకపోతే ఇరాన్ పవర్ ప్లాంట్లను నాశనం చేస్తామని ట్రంప్ గతంలో చేసిన వ్యాఖ్యలకు ఈ ప్రకటన ప్రతిస్పందనగా వచ్చింది. ఈ వ్యాఖ్యలతో గల్ఫ్ ప్రాంతంలో యుద్ధ జ్వాలలు రాజుకున్నాయని నివేదికలు సూచిస్తున్నాయి.

ఇరాన్ పార్లమెంట్ స్పీకర్ మొహమ్మద్ బాకర్ ఖాలిబాఫ్ కూడా ట్రంప్ వ్యాఖ్యలను ఖండించారు. తమ మౌలిక సదుపాయాలను లక్ష్యంగా చేసుకుంటే, ఈ ప్రాంతంలోని కీలక వ్యవస్థలన్నీ కోలుకోలేని విధంగా దెబ్బతింటాయని ఆయన హెచ్చరించారు. తమ విద్యుత్ కేంద్రాలను పునర్నిర్మించే వరకు హర్మూజ్ జలసంధిని శాశ్వతంగా మూసివేస్తామని, ఒక్క చమురు ట్యాంకర్‌ను కూడా ముందుకు కదలనివ్వబోమని ఇరాన్ సైన్యం స్పష్టం చేసింది.

ఈ సంక్షోభం అంతర్జాతీయ మార్కెట్లపై తీవ్ర ప్రభావం చూపింది. ఫిబ్రవరి 28 నుంచి జలసంధి మూతపడటంతో ఇంధన సరఫరా నిలిచిపోయి, బ్యారెల్ ముడిచమురు ధర 119 డాలర్ల గరిష్ఠ స్థాయికి చేరుకుంది. ఈ నేపథ్యంలో, ఇరాన్ ఇజ్రాయెల్‌పై క్షిపణులు ప్రయోగిస్తుండగా, లెబనాన్ నుంచి హెజ్బొల్లా దాడులతో మధ్యప్రాచ్యంలో యుద్ధ వాతావరణం మరింత ముదురుతోంది. ట్రంప్ విధించిన గడువు సమీపిస్తుండటంతో వైట్ హౌస్ అధికారులు మిత్రదేశాలతో అత్యవసర చర్చలు జరుపుతున్నారు.