తెలంగాణ రాష్ట్ర మాజీ మంత్రి జీవన్ రెడ్డి, ప్రస్తుత కాంగ్రెస్ ప్రభుత్వంపై తీవ్ర విమర్శలు గుప్పించారు. ముఖ్యమంత్రి రేవంత్ రెడ్డి పాలన కంటే, గత బీఆర్ఎస్ ప్రభుత్వ హయాంలో కేసీఆర్ పాలన మెరుగ్గా ఉందని ఆయన వ్యాఖ్యానించారు. త్వరలోనే బీఆర్ఎస్ పార్టీలో చేరనున్నట్లు కూడా ఆయన స్పష్టం చేశారు.
గురువారం మీడియాతో మాట్లాడుతూ, గత బీఆర్ఎస్ ప్రభుత్వం రైతుల సంక్షేమానికి ప్రాధాన్యత ఇచ్చిందని, నష్టపోయిన ప్రతి రైతును ఆదుకుందని జీవన్ రెడ్డి ప్రశంసించారు. అయితే, ప్రస్తుత కాంగ్రెస్ ప్రభుత్వం ఇచ్చిన హామీలను అమలు చేయడంలో విఫలమైందని, ఉద్యోగులు, నిరుద్యోగుల సమస్యలను నిర్లక్ష్యం చేస్తోందని ఆయన ఆరోపించారు.
ప్రజలు కాంగ్రెస్ ప్రభుత్వం నుంచి ఆశించిన పాలన లభించడం లేదని, రేవంత్ రెడ్డి పాలనను చూసిన తర్వాత కేసీఆర్ పాలనే బాగుందని ప్రజలు భావిస్తున్నారని ఆయన పేర్కొన్నారు. జాతీయ స్థాయిలో బీజేపీ మెరుగ్గా ఉందని, రాష్ట్ర స్థాయిలో కేసీఆర్ సమర్థవంతమైన నాయకుడని ఆయన అభిప్రాయపడ్డారు. తెలంగాణ రాష్ట్ర ఏర్పాటు కేసీఆర్ కృషి వల్లే సాధ్యమైందని గుర్తు చేశారు.
జీవన్ రెడ్డి వ్యాఖ్యలు రాజకీయ వర్గాల్లో తీవ్ర చర్చనీయాంశంగా మారాయి. ఇటీవల కాంగ్రెస్ పార్టీకి రాజీనామా చేసిన ఆయన, త్వరలో బీఆర్ఎస్ లో చేరనున్నట్లు సమాచారం.
ఏప్రిల్ 13వ తేదీన జగిత్యాలలో బీఆర్ఎస్ వర్కింగ్ ప్రెసిడెంట్ కేటీఆర్ సమక్షంలో జీవన్ రెడ్డి బీఆర్ఎస్ పార్టీలో చేరనున్నట్లు తెలుస్తోంది. కేటీఆర్ ఈరోజు జగిత్యాలలో జీవన్ రెడ్డి నివాసానికి వెళ్లి, పార్టీలోకి అధికారికంగా ఆహ్వానించనున్నట్లు సమాచారం.
