తెలంగాణ మలిదశ ఉద్యమంలో క్రియాశీలకంగా పనిచేసిన అగ్రహారానికి చెందిన ఉద్యమకారిణి సత్తెమ్మ మృతి పట్ల బీఆర్ఎస్ వర్కింగ్ ప్రెసిడెంట్ కేటీఆర్ తీవ్ర సంతాపం తెలిపారు. ఆమె పార్థివ దేహానికి నివాళులర్పించి, స్వయంగా పాడె మోసి వీడ్కోలు పలికారు.
వేములవాడ నియోజకవర్గం అగ్రహారానికి చెందిన సత్తెమ్మ, తెలంగాణ రాష్ట్ర సాధనలో కీలక పాత్ర పోషించారు. ఉద్యమ సమయంలో తన అంకితభావంతో, నిబద్ధతతో ముందుకు సాగారు. ప్రతిరోజూ ఉద్యమంలో పాల్గొంటూ, 'జై తెలంగాణ' నినాదమే ఊపిరిగా జీవించిన ధీరవనితగా ఆమెను కేటీఆర్ స్మరించుకున్నారు.
సత్తెమ్మ పోరాట స్ఫూర్తి నేటి యువతకు ఆదర్శమని, ఆమె మరణం తెలంగాణ ఉద్యమకారులకు తీరని లోటు అని కేటీఆర్ అన్నారు. ఆమె కుటుంబ సభ్యులకు ప్రగాఢ సానుభూతి తెలియజేశారు.
కేటీఆర్ తో పాటు పలువురు బీఆర్ఎస్ నాయకులు, కార్యకర్తలు సత్తెమ్మకు నివాళులర్పించారు. ఆమె అంత్యక్రియలు అధికారిక లాంఛనాలతో నిర్వహించాలని స్థానికులు కోరుతున్నారు.
