కామారెడ్డి ప్రభుత్వ మెడికల్ కాలేజీ మరియు జనరల్ ఆసుపత్రి అభివృద్ధికి అవసరమైన 26 ఎకరాల అదనపు భూమి, 60 అడుగుల అప్రోచ్ రోడ్డు మంజూరు చేయాలని కామారెడ్డి ఎమ్మెల్యే కాటిపల్లి వెంకట రమణ రెడ్డి ముఖ్యమంత్రి రేవంత్ రెడ్డిని కోరారు. ఈ మేరకు ఆయన సోమవారం ముఖ్యమంత్రిని కలిసి వినతి పత్రం సమర్పించారు.
కామారెడ్డిలో ప్రభుత్వ మెడికల్ కాలేజీ మరియు జనరల్ ఆసుపత్రిని పూర్తిస్థాయి మౌలిక సదుపాయాలతో అభివృద్ధి చేయాలని ఎమ్మెల్యే కాటిపల్లి వెంకట రమణ రెడ్డి ముఖ్యమంత్రి రేవంత్ రెడ్డికి విజ్ఞప్తి చేశారు. జిల్లా వైద్య రంగం ఎదుర్కొంటున్న సమస్యలను వివరిస్తూ, ఆయన ఒక వినతి పత్రాన్ని అందించారు.
ప్రస్తుతం కాలేజీకి కేవలం 7 ఎకరాల భూమి మాత్రమే ఉందని, జాతీయ వైద్య కమిషన్ (ఎన్ఎంసీ) నిబంధనల ప్రకారం పీజీ సీట్లు, హాస్టళ్లు, స్టాఫ్ క్వార్టర్స్, సూపర్ స్పెషాలిటీ బ్లాక్, ఆట స్థలం వంటి సదుపాయాల ఏర్పాటుకు అదనంగా 26 ఎకరాల భూమి అవసరమని ఎమ్మెల్యే తెలిపారు. ఈ భూమిని ప్రభుత్వ డిగ్రీ కళాశాల పరిధిలోని భూముల నుంచి కేటాయించాలని కోరారు.
అలాగే, మెడికల్ కాలేజీకి ప్రస్తుతం ఉన్న 20 అడుగుల ఇరుకైన రహదారి సమస్యను ప్రస్తావించారు. ఈ రహదారి 3 కిలోమీటర్లు చుట్టూ తిరిగి వెళ్లాల్సి వస్తోందని, కావున డిగ్రీ కళాశాల ప్రాంగణం నుంచి నేరుగా 60 అడుగుల వెడల్పుతో కూడిన అప్రోచ్ రోడ్డును మంజూరు చేయాలని విజ్ఞప్తి చేశారు.
మార్చురీ, ట్రామా కేర్ సెంటర్, వికలాంగుల పునరావాస కేంద్రం వంటి విభాగాల ఏర్పాటుకు కూడా భూమి కేటాయింపు అవసరమని ఎమ్మెల్యే వివరించారు. ముఖ్యమంత్రి ఈ ప్రతిపాదనలపై సానుకూలంగా స్పందించి, త్వరలో పరిశీలించి తగిన ఆదేశాలు జారీ చేస్తామని హామీ ఇచ్చినట్లు సమాచారం. ఈ సందర్భంగా ఆర్మూర్ ఎమ్మెల్యే పైడి రాకేష్ రెడ్డి కూడా పాల్గొన్నారు.
