మహబూబాబాద్ హత్య కేసులో దోషికి జీవిత ఖైదు, జరిమానా

మహబూబాబాద్ టౌన్ పోలీస్ స్టేషన్ పరిధిలో 2025లో బీఎన్‌ఎస్ సెక్షన్ 103 కింద క్రైమ్ నెం. 304/2025గా నమోదైన హత్య కేసుపై ప్రధాన జిల్లా మరియు సెషన్స్ కోర్టు విచారణ జరిపింది. ఈ కేసు ఎస్‌సి నెం. 136/2025గా కోర్టులో విచారణకు వచ్చింది. ఫిర్యాదుదారు వనగల్ల గుట్టయ్య (43), నర్సింహులగూడెం గ్రామానికి చెందిన టిఫిన్ సెంటర్ యజమాని కాగా, నిందితుడు సంపత్ శ్రీను (40), మహబూబాబాద్‌కు చెందిన మేస్త్రీ.

విచారణలో భాగంగా కోర్టుకు సమర్పించిన సాక్ష్యాధారాలను, వాదనలను పరిగణనలోకి తీసుకున్న న్యాయమూర్తి ఎండీ అబ్దుల్ రఫీ, క్రిమినల్ ప్రొసీజర్ కోడ్ సెక్షన్ 235(2) ప్రకారం నిందితుడిని దోషిగా నిర్ధారించి, జీవిత ఖైదు శిక్ష విధించారు. దీంతో పాటు రూ.5,000 జరిమానా కూడా విధించారు. జరిమానా చెల్లించని పక్షంలో అదనపు శిక్ష అనుభవించాల్సి ఉంటుందని స్పష్టం చేశారు.

ఈ కేసులో ప్రత్యేక ప్రజా అభియోగాధికారి కొంపల్లి వెంకటయ్య వాదనలు వినిపించారు. కోర్టు లైజన్ అధికారిగా ఎన్. జీనత్ (ఎస్‌ఐ, డీసీఆర్‌బీ) వ్యవహరించారు. దర్యాప్తును మొదట టి. ప్రశాంత్ బాబు (ఎస్‌ఐ) ప్రారంభించగా, తరువాత పి. సర్వయ్య (సీఐ) మరియు జి. మహేందర్ రెడ్డి (ఇన్‌స్పెక్టర్) కొనసాగించారు. కేసు పర్యవేక్షణను ఎన్. తిరుపతి (డీఎస్పీ) మరియు జి. మహేందర్ రెడ్డి నిర్వహించారు.

కేసు డాక్యుమెంటేషన్ బాధ్యతలను బుక్యా రవీందర్ (పిసి-537, సీడీఓ) నిర్వహించారు. పోలీసుల సమర్థవంతమైన దర్యాప్తు, ప్రాసిక్యూషన్ వాదనలు, సాక్ష్యాధారాల పటిమ కారణంగా నిందితుడికి శిక్ష పడినట్లు అధికారులు తెలిపారు. సమాజంలో శాంతి భద్రతల పరిరక్షణకు ప్రజలు సహకరించాలని పోలీసులు విజ్ఞప్తి చేశారు.