సంగారెడ్డి జిల్లా కలెక్టరేట్ సమావేశ మందిరంలో ఎస్సీ, ఎస్టీ, బీసీ, మైనారిటీ సంక్షేమ వసతి గృహాల విద్యార్థులకు నిర్వహించిన నైపుణ్య అభివృద్ధి శిక్షణ కార్యక్రమంలో అడిషనల్ కలెక్టర్ పాండు ముఖ్య అతిథిగా పాల్గొని, విద్యార్థులకు కీలక సూచనలు చేశారు. భవిష్యత్ విజయానికి నైపుణ్యాభివృద్ధి అత్యవసరమని ఆయన నొక్కి చెప్పారు.
ప్రజా పాలన ప్రగతి ప్రణాళికలో భాగంగా జరుగుతున్న సంక్షేమ వారోత్సవాల్లో భాగంగా ఈ శిక్షణా కార్యక్రమం ఏర్పాటు చేయబడింది. ఈ సందర్భంగా అడిషనల్ కలెక్టర్ పాండు మాట్లాడుతూ, విద్యార్థులు తమ జీవిత లక్ష్యాలను స్పష్టంగా నిర్దేశించుకోవాలని, ఆ దిశగా క్రమశిక్షణతో కృషి చేస్తే విజయం సులభమవుతుందని తెలిపారు.
నేటి పోటీ ప్రపంచంలో కేవలం పాఠ్యపుస్తకాల జ్ఞానం సరిపోదని, కమ్యూనికేషన్ స్కిల్స్, టెక్నికల్ నైపుణ్యాలు, సమస్య పరిష్కార సామర్థ్యం వంటివి విద్యార్థులను ఉన్నత స్థాయికి తీసుకెళ్తాయని ఆయన పేర్కొన్నారు. ప్రభుత్వం అందిస్తున్న శిక్షణా కార్యక్రమాలను సద్వినియోగం చేసుకోవాలని విద్యార్థులకు సూచించారు.
విజయం అనేది నిరంతర శ్రమ, పట్టుదల, క్రమశిక్షణల ఫలితమని, వైఫల్యాలను ఎదుర్కొని పాఠాలుగా స్వీకరించి ముందుకు సాగాలని ఆయన విద్యార్థులకు పిలుపునిచ్చారు. సామాజిక నేపథ్యాన్ని అడ్డంకిగా కాకుండా, అవకాశంగా మలుచుకుని ఎదగాలని ఆయన ప్రోత్సహించారు.
