వైశాఖ మాసం బహుళ దశమి సందర్భంగా మే 12వ తేదీన తిరుమలలో హనుమజ్జయంతి వేడుకలను వైభవంగా నిర్వహించడానికి టీటీడీ సర్వం సిద్ధం చేసింది. ఈ సందర్భంగా వివిధ ఆలయాల్లో ప్రత్యేక పూజలు, కార్యక్రమాలు నిర్వహించబడతాయి.
ప్రతి సంవత్సరంలాగే ఈ ఏడాది కూడా అంజనాద్రి కొండపై హనుమంతుని జన్మదినాన్ని పురస్కరించుకుని టీటీడీ విస్తృత ఏర్పాట్లు చేసింది. శ్రీవారి ఆలయానికి ఎదురుగా ఉన్న శ్రీ బేడి ఆంజనేయస్వామి వారికి, అలాగే కాలినడకమార్గంలో ఏడవ మైలు వద్ద ఉన్న శ్రీప్రసన్న ఆంజనేయస్వామి వారికి ప్రత్యేక పూజలు నిర్వహించనున్నట్లు అధికారులు తెలిపారు.
తిరుమల కొండల్లోని పవిత్ర జాపాలి తీర్థంలో కొలువైన హనుమంతుడికి టీటీడీ తరపున పట్టువస్త్రాలు సమర్పించడం ఆనవాయితీ. ఈ ఏడాది కూడా ఈ సంప్రదాయాన్ని కొనసాగిస్తూ, జాపాలి తీర్థంలోని హనుమంతునికి పట్టువస్త్రాలు సమర్పించనున్నారు. ఈ దర్శనం సకల పాపాలను తొలగిస్తుందని భక్తుల నమ్మకం.
హనుమజ్జయంతి రోజున శ్రీ బేడి ఆంజనేయస్వామి వారికి ప్రత్యేక అభిషేకాలు, పూజా కార్యక్రమాలు ఉంటాయి. అదేవిధంగా, తిరుమల కాలినడక మార్గంలోని ఏడవ మైలు వద్ద ఉన్న శ్రీ ప్రసన్న ఆంజనేయస్వామి వారి భారీ విగ్రహానికి కూడా విశేష పూజలు జరగనున్నాయి. జాపాలి తీర్థంలో జరిగే హనుమంతుని జయంతి వేడుకలు కన్నులపండువగా సాగుతాయి.
మే 12న సాయంత్రం 3 గంటలకు ఏడవ మైలు వద్ద ఉన్న శ్రీ ప్రసన్న ఆంజనేయస్వామి విగ్రహం వద్ద ప్రత్యేక పూజా కార్యక్రమాలు నిర్వహిస్తారు. భక్తుల సౌకర్యార్థం, ఉదయం 11 గంటల నుండి సాయంత్రం 6 గంటల వరకు తిరుమల నుండి ఏడో మైలుకు, తిరిగి తిరుమలకు ఉచిత రవాణా సౌకర్యం కల్పించబడుతుందని టీటీడీ అధికారులు తెలిపారు.
