శ్రీవారి దర్శనం, వసతి పేరుతో భక్తులకు మోసం: ఇద్దరు నిందితులు అరెస్ట్

తిరుపతి జిల్లా ఎస్పీ శ్రీ ఎల్. సుబ్బరాయుడు, ఐపీఎస్., ఆదేశాల మేరకు, తిరుమల II టౌన్ పోలీసులు ఈ కేసులో నిందితులను అదుపులోకి తీసుకున్నారు. చిత్తూరు జిల్లా పెనుమూరు మండలానికి చెందిన ఈ నిందితులు, 'శ్రావణ్ కళ' అనే పేరిట సోషల్ మీడియాలో ఆకర్షణీయమైన పోస్టులు పెట్టి, వీఐపీ దర్శనం, వసతి కల్పిస్తామని అమాయక భక్తులను మోసం చేసినట్లు గుర్తించారు. భక్తుల నుండి యూపీఐ ద్వారా డబ్బులు స్వీకరించి, ఎటువంటి సేవలు అందించలేదని దర్యాప్తులో తేలింది.

టీటీడీ విజిలెన్స్ విభాగం ఫిర్యాదు మేరకు తిరుమల II టౌన్ పోలీస్ స్టేషన్‌లో కేసు నమోదు చేసి, ప్రత్యేక దర్యాప్తు బృందం విచారణ చేపట్టింది. నిందితుల వద్ద నుంచి మొబైల్ ఫోన్లు, బ్యాంకు పాస్‌బుక్స్ స్వాధీనం చేసుకున్నారు. సోషల్ మీడియా చాట్స్, యూపీఐ లావాదేవీలకు సంబంధించిన ఆధారాలను సేకరించారు.

దర్యాప్తులో, నిందితులు ఆంధ్రప్రదేశ్‌తో పాటు తమిళనాడు, కర్ణాటక, కేరళ, మహారాష్ట్ర రాష్ట్రాలకు చెందిన అనేకమంది భక్తులను ఇదే విధంగా మోసం చేసినట్లు వెల్లడైంది. వీరిలో కామసాని పవన్ కుమార్ రెడ్డి @ పవన్ కుమార్ @ నాగరాజ్, బొడిరెడ్డి చెన్నకేశవులు రెడ్డి అనే ఇద్దరు నిందితులను అరెస్ట్ చేసి, గౌరవ న్యాయస్థానం ముందు హాజరుపరిచారు.

ఎస్పీ శ్రీ ఎల్. సుబ్బరాయుడు మాట్లాడుతూ, భక్తుల విశ్వాసాన్ని దుర్వినియోగం చేసే వారిపై కఠిన చర్యలు తీసుకుంటామని హెచ్చరించారు. శ్రీవారి దర్శనం టిక్కెట్లు కేవలం అధికారిక టీటీడీ వెబ్‌సైట్ ద్వారానే పొందాలని, సోషల్ మీడియా ప్రకటనలను నమ్మవద్దని, అపరిచితులకు యూపీఐ ద్వారా డబ్బులు పంపవద్దని, అనుమానాస్పద సమాచారాన్ని వెంటనే పోలీసులకు తెలియజేయాలని ప్రజలకు సూచించారు.