కాంగ్రెస్ ప్రభుత్వం ఇటీవల అసెంబ్లీలో ప్రవేశపెట్టిన బడ్జెట్పై బీఆర్ఎస్ పార్టీ తీవ్ర విమర్శలు గుప్పించింది. రాష్ట్రంలో కాంగ్రెస్ ప్రభుత్వం ఏర్పడి 26 నెలలు గడిచినా అభివృద్ధి జాడలేదని, ఎన్నికల హామీలను నెరవేర్చడంలో ప్రభుత్వం విఫలమైందని పార్టీ సీనియర్ నాయకులు ఆరోపించారు.
దోమకొండ మండల కేంద్రంలో బీఆర్ఎస్ పార్టీ ఆధ్వర్యంలో నిర్వహించిన పత్రికా సమావేశంలో, కాంగ్రెస్ ప్రభుత్వంపై తీవ్ర విమర్శలు చేశారు. రాష్ట్రంలో కాంగ్రెస్ ప్రభుత్వం ఏర్పడి 26 నెలలు దాటినా ఎక్కడా అభివృద్ధి కనిపించడం లేదని నాయకులు ఆరోపించారు. గత బీఆర్ఎస్ పాలనలో సాధించిన అభివృద్ధిని ప్రజలు గుర్తిస్తారని, ప్రస్తుత ప్రభుత్వం ఆ దిశగా పనిచేయడం లేదని విమర్శించారు.
ప్రభుత్వం ఏర్పడిన నాటి నుంచి గత బీఆర్ఎస్ పాలనపై విమర్శలు చేయడమే ముఖ్యమంత్రి పనిగా మారిపోయిందని, మాజీ ముఖ్యమంత్రి కేసీఆర్ నాయకత్వంలో సాధించిన తెలంగాణ అభివృద్ధి గురించి ప్రజలకు పూర్తిగా అవగాహన ఉందని వారు పేర్కొన్నారు. గత ప్రభుత్వ సంక్షేమ పథకాలను కొనసాగించడంలో విఫలమైన ముఖ్యమంత్రి బాధ్యతను మరిచి వ్యాఖ్యలు చేస్తున్నారని మండిపడ్డారు.
ఇటీవల అసెంబ్లీలో మూడోసారి బడ్జెట్ ప్రవేశపెట్టినప్పటికీ, ఎన్నికల సమయంలో ఇచ్చిన ఆరు గ్యారంటీలు, 420 హామీల్లో ఒక్కటీ బడ్జెట్లో ప్రతిఫలించకపోవడం సిగ్గుచేటని విమర్శించారు. ప్రజలను మోసం చేసిన ప్రభుత్వంగా కాంగ్రెస్ నిలిచిందని ఆరోపించారు. అభివృద్ధి పనులు నిలిచిపోయాయని, ఇచ్చిన హామీలను నెరవేర్చడంలో ప్రభుత్వం విఫలమైందని నాయకులు అభిప్రాయపడ్డారు.
ఈ సమావేశంలో మాజీ మార్కెట్ కమిటీ చైర్మన్ కుంచాల శేఖర్, మాజీ సింగిల్ విండో చైర్మన్ కొడిప్యాక తిరుపతి గౌడ్, సంగమేశ్వర్ గ్రామ సర్పంచ్ లోయపల్లి శ్రీనివాస్ రావు, ఉప సర్పంచ్ బొమ్మెర శ్రీనివాస్, పట్టణ అధ్యక్షుడు బోరెడ్డి కిషన్ రెడ్డి, మండల యూత్ అధ్యక్షుడు పాలకుర్తి శేఖర్తో పాటు పలువురు నాయకులు పాల్గొన్నారు.
