గిరిజన హామీల అమలుపై షర్మిలకు వినతి

గిరిజన కాంగ్రెస్ నాయకులు సమర్పించిన వినతి పత్రంలో, ప్రస్తుత కూటమి ప్రభుత్వం గిరిజనులకు ఇచ్చిన హామీలను అమలు చేయడంలో విఫలమైందని ఆరోపించారు. ఉద్యోగాల్లో 100 శాతం రిజర్వేషన్ కల్పిస్తామని చెప్పిన హామీ నెరవేరలేదని, మెగా డీఎస్సీలో గిరిజనులకు తగిన ప్రాధాన్యం దక్కలేదని విమర్శించారు.

ఆశ్రమ పాఠశాలల్లో హెల్త్ అసిస్టెంట్ల నియామకాలపై హామీ అమలు కాలేదని, దీనివల్ల విద్యార్థుల ఆరోగ్యంపై ప్రభావం పడిందని, కొందరి మరణాలకు ఇది కారణమని నాయకులు పేర్కొన్నారు. గిరిజన భూహక్కులను రక్షించే 1/70 చట్టానికి విరుద్ధంగా ప్రభుత్వం తీసుకువచ్చిన జి.ఓ. నెంబర్లు 2, 13, 51లను తీవ్రంగా వ్యతిరేకించారు. ఇవి కార్పొరేట్ సంస్థలకు ప్రయోజనం చేకూర్చే ప్రయత్నమని ఆరోపించారు.

గిరిజనులకు ఇచ్చిన హామీలను వెంటనే అమలు చేయాలని, మెగా డీఎస్సీలో న్యాయం చేయాలని, ఆశ్రమ పాఠశాలల్లో హెల్త్ సిబ్బందిని నియమించాలని, వివాదాస్పద జి.ఓ.లను రద్దు చేయాలని డిమాండ్ చేశారు. ఈ సమస్యలపై స్పందించిన వై.ఎస్. షర్మిలారెడ్డి, గిరిజనుల సమస్యల పరిష్కారానికి పోరాటం చేస్తానని, రాష్ట్ర ప్రభుత్వ దృష్టికి తీసుకెళ్తానని భరోసా ఇచ్చారు.