కామారెడ్డి జిల్లా డీసీసీ కార్యాలయంలో శుక్రవారం కాంగ్రెస్ పార్టీలో బీజేపీ, బీఆర్ఎస్ పార్టీలకు చెందిన యువత, కార్యకర్తలు పెద్ద ఎత్తున చేరారు. ఈ చేరికలు రాజకీయంగా ప్రాధాన్యత సంతరించుకున్నాయి.
జిల్లా కాంగ్రెస్ కమిటీ అధ్యక్షుడు ఏలే మల్లికార్జున్ ఆధ్వర్యంలో జరిగిన ఈ కార్యక్రమంలో టీపీసీసీ రాష్ట్ర ప్రధాన కార్యదర్శి గడ్డం చంద్రశేఖర్ రెడ్డి సమక్షంలో ఇంద్రనగర్ కాలనీ (24వ వార్డ్)కు చెందిన సుమారు 40 మంది కార్యకర్తలు కాంగ్రెస్ కండువా కప్పుకొని పార్టీలో చేరారు.
ఈ సందర్భంగా గడ్డం చంద్రశేఖర్ రెడ్డి మాట్లాడుతూ, "కార్యకర్తలే పార్టీకి అసలైన బలం. కొత్తగా చేరిన ప్రతి ఒక్కరికీ పార్టీలో తగిన గుర్తింపు, గౌరవం లభిస్తుంది" అని తెలిపారు. నియోజకవర్గ అభివృద్ధి, ప్రజా సమస్యల పరిష్కారం కోసం ప్రతి కార్యకర్త కృషి చేయాలని ఆయన పిలుపునిచ్చారు.
కొత్తగా చేరిన కార్యకర్తలు కాంగ్రెస్ పార్టీ బలోపేతానికి అంకితభావంతో పనిచేస్తామని, రాబోయే రోజుల్లో పార్టీ విజయానికి కట్టుబడి ఉంటామని పేర్కొన్నారు. ఈ చేరికలు స్థానిక రాజకీయాల్లో చర్చనీయాంశంగా మారాయి.
ఈ కార్యక్రమంలో కాంగ్రెస్ సేవాదళ్ జిల్లా అధ్యక్షుడు గడ్డమీద మహేష్తో పాటు పలువురు కాంగ్రెస్ నాయకులు, కార్యకర్తలు పాల్గొన్నారు.
