రాష్ట్ర ముఖ్యమంత్రి రేవంత్ రెడ్డి ప్రభుత్వం, బీఆర్ఎస్ పార్టీ అంటేనే భయంతో వ్యవహరిస్తోందని, కేసీఆర్ సభల నేపథ్యంలోనే 'రైతు భరోసా' వంటి పథకాలను ప్రకటిస్తోందని బీఆర్ఎస్ పార్టీ సోషల్ మీడియా కోఆర్డినేటర్ టి.మధువన్ ఆరోపించారు.
ముఖ్యమంత్రి పర్యటనలకు ముందు 'రైతు భరోసా' పథకాన్ని ప్రకటించడం, రాబోయే జగిత్యాల సభకు ముందు కూడా ఇదే పథకాన్ని మళ్ళీ ప్రకటించడం ప్రభుత్వ భయానికి నిదర్శనమని ఆయన పేర్కొన్నారు. ఈ ప్రభుత్వం రైతులకు నిజమైన భరోసాను ఇవ్వడంలో విఫలమైందని, రాష్ట్ర ప్రజలకు ఎలాంటి నమ్మకాన్ని కలిగించలేకపోయిందని మధువన్ విమర్శించారు.
ప్రభుత్వానికి రైతుల పట్ల ప్రేమ గానీ, రాష్ట్ర ప్రజల పట్ల బాధ్యత గానీ లేదని, కేవలం బీఆర్ఎస్ పార్టీ అంటేనే భయం, కేసీఆర్ సభలు నిర్వహిస్తే వెన్నులో వణుకు పుడుతోందని ఆయన ఆరోపించారు. ఈ ప్రభుత్వం బాధ్యతతో కాకుండా, బీఆర్ఎస్ పార్టీ భయంతోనే నడుస్తోందని మధువన్ వ్యాఖ్యానించారు.
బాధ్యత లేని ప్రభుత్వానికి ప్రజలే తగిన బుద్ధి చెబుతారని ఆయన అన్నారు. తెలంగాణ ప్రజల ఆకాంక్షలను నెరవేర్చడంలో ఈ ప్రభుత్వం విఫలమైందని, రాబోయే రోజుల్లో ప్రజలు తమ తీర్పును వెలువరిస్తారని ఆయన అభిప్రాయపడ్డారు.
