తెలంగాణ రాష్ట్ర ఏర్పాటుకు బాబాసాహెబ్ అంబేద్కర్ చేసిన కృషి ఎంతో కీలకమని, ఆయన అందించిన ఆర్టికల్ 3 శక్తి వల్లే రాష్ట్ర ఏర్పాటుకు పునాది పడిందని తెలంగాణ రాష్ట్ర సమితి నాయకురాలు కవిత పేర్కొన్నారు. అంబేద్కర్ 135వ జయంతి సందర్భంగా ఆమె ఈ వ్యాఖ్యలు చేశారు.
హైదరాబాద్లో అంబేద్కర్ 135వ జయంతి సందర్భంగా ఏర్పాటు చేసిన కార్యక్రమంలో కవిత మాట్లాడుతూ, అంబేద్కర్ ఒక సిద్ధాంతమని, ఆయన ఆలోచనలు నిరంతరం మన మధ్యనే ఉంటాయని అన్నారు. అంబేద్కర్ ఆశించిన విధంగా తెలంగాణలో స్టేట్ సోషలిజం వర్ధిల్లాలని, అయితే గత 12 ఏళ్లలో ఆ పరిస్థితి రాలేదని ఆమె ఆవేదన వ్యక్తం చేశారు.
రాష్ట్రంలో దళితులు, మహిళలపై ఆకృత్యాలు పెరుగుతున్నాయని, ఏ ప్రాజెక్ట్ కట్టినా దళితులే భూములు కోల్పోతున్నారని, వారికి ఇచ్చిన అసైన్డ్ భూములను ప్రభుత్వాలు లాక్కుంటున్నాయని కవిత ఆరోపించారు. పరిగిలో 1200 ఎకరాలు సేకరిస్తే, అందులో వెయ్యి ఎకరాలు అసైన్డ్ భూములేనని ఆమె ఉదహరించారు.
ఈ భూమి మీద రేవంత్ రెడ్డి ఒక్కరే యాంటీ-అంబేద్కర్ వ్యక్తి అని కవిత విమర్శించారు. అంబేద్కర్ 135వ జయంతి సందర్భంగానైనా ప్రభుత్వానికి బుద్ధి వచ్చి పేదల పక్షాన నిలబడాలని ఆమె కోరారు. అంబేద్కర్ స్ఫూర్తితో పేదలకు న్యాయం జరిగేలా ప్రభుత్వంపై పోరాటం చేస్తామని తెలిపారు.
ఎస్సీ, ఎస్టీ ఎంప్లాయీస్ ఫోరం ఆధ్వర్యంలో అంబేద్కర్ జయంతి వేడుకలను వినూత్నంగా నిర్వహించడం సంతోషకరమని, ఈ కార్యక్రమానికి సహకరించిన కుమారన్నకు ధన్యవాదాలు తెలిపారు. అంబేద్కర్ ఆడబిడ్డలకు ఎంతో మేలు చేశారని, ఆయన స్ఫూర్తితో మరిన్ని ఉద్యమాలు వచ్చి కష్టాలు తొలగిపోవాలని ఆమె ఆకాంక్షించారు.
