కేంద్ర ఎన్నికల సంఘం ఆదేశాల మేరకు ఏప్రిల్ మాసంలో ప్రారంభం కానున్న స్పెషల్ ఇంటెన్సివ్ రివిజన్ (SIR) కార్యక్రమాన్ని పారదర్శకంగా, సమర్థవంతంగా నిర్వహించడానికి రాజకీయ పార్టీల పూర్తి సహకారం అవసరమని జిల్లా కలెక్టర్ ప్రావీణ్య అన్నారు.
గురువారం కలెక్టరేట్ మినీ సమావేశ మందిరంలో రాజకీయ పార్టీల ప్రతినిధులతో నిర్వహించిన సమావేశంలో, కలెక్టర్ ఎస్.ఐ.ఆర్ ప్రక్రియ ప్రాముఖ్యతను, ఓటరు జాబితా సవరణలో ఎదురయ్యే సవాళ్లను వివరించారు. అర్హులైన ప్రతి పౌరుని పేరు జాబితాలో చేర్చడం, ఎలాంటి పొరపాట్లు లేకుండా జాబితాను సిద్ధం చేయడం అత్యంత కీలకమని ఆమె నొక్కి చెప్పారు.
ఈ ప్రక్రియలో బూత్ లెవెల్ ఆఫీసర్లతో పాటు, రాజకీయ పార్టీల తరపున బూత్ లెవెల్ ఏజెంట్ల (BLA) పాత్ర చాలా ముఖ్యమైనదని కలెక్టర్ తెలిపారు. అందువల్ల, అన్ని రాజకీయ పార్టీలు తమ బూత్ లెవెల్ ఏజెంట్లను ఈ నెల 30లోగా నియమించి, వారి జాబితాను నియోజకవర్గాల వారీగా సమర్పించాలని ఆమె సూచించారు.
బీఎల్ఏల నియామకం పూర్తయిన తర్వాత, బూత్ లెవెల్ ఆఫీసర్లు (BLO) మరియు బీఎల్ఏలకు సంయుక్త సమావేశం నిర్వహించి, ఎస్.ఐ.ఆర్ నిబంధనలు, విధానాలపై అవగాహన కల్పించనున్నట్లు కలెక్టర్ తెలిపారు. ఈ ప్రక్రియను సాఫీగా, పారదర్శకంగా నిర్వహించడానికి అన్ని రాజకీయ పార్టీలు సమన్వయంతో పనిచేయాలని ఆమె కోరారు.
ఈ సమావేశంలో అడిషనల్ కలెక్టర్ మాధురి, ఎన్నికల విభాగపు అధికారులు, వివిధ రాజకీయ పార్టీల ప్రతినిధులు పాల్గొన్నారు.
