తెలంగాణ అసెంబ్లీలో తల్లిదండ్రుల సంరక్షణ చట్టం బిల్లు ఆమోదం

తెలంగాణ అసెంబ్లీలో తల్లిదండ్రుల సంరక్షణ చట్టం బిల్లు ఆదివారం ఆమోదం పొందింది. ఈ చట్టం ద్వారా ప్రభుత్వ ఉద్యోగులు, ప్రజాప్రతినిధులు తమ తల్లిదండ్రులను సంరక్షించాల్సిన బాధ్యతను కలిగి ఉంటారు. నిర్లక్ష్యం వహించినట్లయితే, వారి వేతనం నుంచి రూ.10 వేల వరకు నేరుగా తల్లిదండ్రుల ఖాతాకు బదిలీ చేయబడుతుంది.

చర్చ సందర్భంగా ముఖ్యమంత్రి రేవంత్ రెడ్డి మాట్లాడుతూ, తల్లిదండ్రుల హక్కులను కాపాడేందుకు ఈ చట్టాన్ని తీసుకువచ్చామని తెలిపారు. కొందరు పిల్లలు తమ ప్రవర్తనతో తల్లిదండ్రులను బాధపెడుతున్నారని ఆయన ఆవేదన వ్యక్తం చేశారు. భయంతోనైనా తల్లిదండ్రులను చూసుకోవాలనేదే తమ లక్ష్యమని ఆయన స్పష్టం చేశారు.

పిల్లల కోసం తల్లిదండ్రులు తమ జీవితాన్ని అంకితం చేస్తారని, అయితే పిల్లలు మాత్రం పెద్దయ్యాక వారిని పట్టించుకోవడం లేదని సీఎం విమర్శించారు. తల్లిదండ్రులకు అండగా నిలవాలనే ఉద్దేశ్యంతో ఈ చట్టం రూపొందించబడిందని ఆయన పేర్కొన్నారు. తల్లిదండ్రులను నిర్లక్ష్యం చేసే వారిని సామాజికంగా బహిష్కరించాలని ప్రజలకు పిలుపునిచ్చారు.

2007లో కేంద్ర ప్రభుత్వం వృద్ధుల సంరక్షణ చట్టం తీసుకొచ్చిందని, అందులో తల్లిదండ్రులకు రూ.10 వేల వరకు ఆర్థిక సహాయం అందించాలని నిబంధన ఉందని సీఎం గుర్తు చేశారు. అదే తరహాలో ఈ చట్టంలోనూ రూ.10 వేల నిబంధనను చేర్చినట్లు ఆయన వివరించారు. ఈ చట్టం ప్రభుత్వ ఉద్యోగులతో పాటు ప్రజాప్రతినిధులకు కూడా వర్తిస్తుందని తెలిపారు.