అజాగ్రత్తగా వాహనాలు నడపడం వల్ల కలిగే ప్రమాదాల గురించి, రహదారి భద్రత ప్రాముఖ్యత గురించి తెలంగాణ డీజీపీ శివధర్ రెడ్డి వాహనదారులను హెచ్చరించారు. వెంకటాపురం మండల కేంద్రంలో 'అరీవ్ అలైవ్' కార్యక్రమంలో ఆయన ఈ వ్యాఖ్యలు చేశారు.
సురక్షితమైన డ్రైవింగ్ అత్యంత ముఖ్యమని, హెల్మెట్ ధరించడం, సీటు బెల్ట్ పెట్టుకోవడం వంటి నియమాలను పాటించాలని డీజీపీ సూచించారు. సెల్ఫోన్ మాట్లాడుతూ వాహనాలు నడపడం ప్రాణాంతకమని ఆయన హెచ్చరించారు. హెల్మెట్ లేకపోవడం వల్లే అధిక శాతం రోడ్డు ప్రమాదాలు జరుగుతున్నాయని, యువత ఎక్కువగా ఈ ప్రమాదాల బారిన పడుతున్నారని ఆయన తెలిపారు.
ఈ సందర్భంగా రహదారి భద్రతా నియమాలను పాటిస్తామని ప్రమాణం చేయించారు. 'అరీవ్ అలైవ్' కార్యక్రమం ద్వారా ప్రజల్లో అవగాహన కల్పించే ప్రయత్నం జరుగుతోంది.
అంతకుముందు, డీజీపీ శివధర్ రెడ్డి, ఐబీ చీఫ్ సుమతి, ఇతర అధికారులు ములుగు జిల్లాలోని పామునూరు అటవీ ప్రాంతంలో కొత్తగా ఏర్పాటు చేసిన పోలీస్ ఔట్ పోస్ట్, ఇంటలిజెన్స్ కో ఆర్డినేషన్ సెంటర్ను ప్రారంభించారు. ఈ ప్రాంతంలో రోడ్ల నిర్మాణం అభివృద్ధికి మార్గం సుగమం చేస్తుందని ఆయన అభిప్రాయపడ్డారు.
తీవ్రవాద ప్రభావిత ప్రాంతంలో రోడ్లు వేయడం అభివృద్ధికి సూచిక అని, ఇది అభినందనీయమని డీజీపీ పేర్కొన్నారు. రోడ్ల నిర్మాణం ద్వారానే ఈ ప్రాంతం అభివృద్ధి చెందుతుందని ఆయన ఆశాభావం వ్యక్తం చేశారు.
