రాష్ట్రవ్యాప్తంగా తీవ్రమైన ఎండల ప్రభావం కొనసాగుతోంది. ఆదివారం 22 జిల్లాల్లో గరిష్ఠ ఉష్ణోగ్రతలు 40 డిగ్రీల సెల్సియస్ దాటడంతో, వాతావరణ శాఖ ఆయా జిల్లాలకు ఆరెంజ్ హెచ్చరికలు జారీ చేసింది. ప్రజలు అప్రమత్తంగా ఉండాలని సూచించారు.
హైదరాబాద్ వాతావరణ కేంద్రం విడుదల చేసిన వివరాల ప్రకారం, భద్రాద్రి కొత్తగూడెం జిల్లా కరకగూడెంలో అత్యధికంగా 41.8 డిగ్రీల ఉష్ణోగ్రత నమోదైంది. జగిత్యాల, మంచిర్యాల జిల్లాల్లో 41.6 డిగ్రీలు, కుమ్రంభీం ఆసిఫాబాద్, పెద్దపల్లి జిల్లాల్లో 41.5 డిగ్రీలు, ములుగు, నిజామాబాద్ జిల్లాల్లో 41.4 డిగ్రీలు, నల్లగొండలో 41.3 డిగ్రీలు నమోదైనట్లు అధికారులు తెలిపారు. మిగిలిన 11 జిల్లాల్లో 40 డిగ్రీల లోపు ఉష్ణోగ్రతలు నమోదయ్యాయి.
రానున్న నాలుగు రోజులు కూడా ఇదే విధమైన ఉష్ణోగ్రతలు కొనసాగే అవకాశం ఉందని వాతావరణ శాఖ అంచనా వేసింది. తీవ్రమైన వేడి, ఉక్కపోతతో ప్రజలు ఇబ్బందులు పడుతున్నారు. ముఖ్యంగా మధ్యాహ్న వేళల్లో బయట తిరగవద్దని అధికారులు సూచిస్తున్నారు.
అయితే, ద్రోణి, ఉపరితల చక్రవాత ఆవర్తనం కారణంగా ఏప్రిల్ 5వ తేదీ వరకు రాష్ట్రంలో అక్కడక్కడ తేలికపాటి వర్షాలు కురిసే అవకాశం ఉందని వాతావరణ కేంద్రం తెలిపింది. సోమవారం మహబూబ్నగర్, నాగర్కర్నూల్, ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, సిద్దిపేట, భువనగిరి, వికారాబాద్, సంగారెడ్డి, మెదక్, కామారెడ్డి జిల్లాల్లో అక్కడక్కడ ఉరుములు, మెరుపులతో కూడిన వర్షాలు కురిసే అవకాశం ఉందని పేర్కొంది.
గడిచిన 24 గంటల్లో కొత్తగూడెం, హైదరాబాద్, ములుగు, సూర్యాపేట, ఆసిఫాబాద్, మంచిర్యాల, మహబూబాబాద్, ఆదిలాబాద్, జనగామ జిల్లాల్లో తేలికపాటి వర్షం నమోదైనట్లు అధికారులు తెలిపారు. ప్రజలు అప్రమత్తంగా ఉండాలని, ఎండ తీవ్రతను దృష్టిలో ఉంచుకుని తగిన జాగ్రత్తలు తీసుకోవాలని సూచించారు.
