తెలంగాణలో వింత వాతావరణం: అధిక వేడి, ఆపై భారీ వర్షాలు

రాష్ట్రంలోని 301 మండలాల్లో హీట్ వేవ్ ముప్పు పొంచి ఉందని ప్రభుత్వం విడుదల చేసిన నివేదిక తెలిపింది. ముఖ్యంగా మంచిర్యాల, పెద్దపల్లి, జగిత్యాల, సూర్యాపేట, కరీంనగర్, నల్గొండ జిల్లాల్లో ఉష్ణోగ్రతలు 46 డిగ్రీల సెల్సియస్‌ను దాటుతున్నాయి. ఈ తీవ్రమైన వేడి కారణంగా పలువురు మరణించినట్లు సమాచారం.

వడదెబ్బ తగలకుండా జాగ్రత్తలు తీసుకోవాలని అధికారులు ప్రజలకు సూచనలు జారీ చేశారు. ముఖ్యంగా వృద్ధులు, పిల్లలు, అనారోగ్యంతో ఉన్నవారు మధ్యాహ్న సమయంలో బయటకు వెళ్లరాదని హెచ్చరించారు.

ఇదిలా ఉండగా, రాష్ట్రంలోని పలు జిల్లాల్లో ఈదురుగాలులతో కూడిన వర్షాలు కురుస్తున్నాయి. ఈ వర్షాలు కొంతవరకు వేడి నుంచి ఉపశమనాన్ని కలిగిస్తున్నాయి. మంచిర్యాల, మహబూబ్ నగర్, సిద్దిపేట జిల్లాల్లోని కొన్ని ప్రాంతాల్లో వర్షాలు నమోదయ్యాయి.

హైదరాబాద్ వాతావరణ కేంద్రం ప్రకారం, రాబోయే రెండు రోజులు రాష్ట్రంలోని పలు జిల్లాల్లో ఉరుములు, మెరుపులతో కూడిన వర్షాలు కురిసే అవకాశం ఉంది. గంటకు 30-40 కిలోమీటర్ల వేగంతో గాలులు వీస్తాయని, జయశంకర్ భూపాలపల్లి, ములుగు, వరంగల్, హనుమకొండ జిల్లాల్లో భారీ వర్షాలు కురిసే అవకాశం ఉందని హెచ్చరించింది.