కామారెడ్డి, జూలై 24
రాష్ట్రంలో ఎల్నినో ప్రభావంతో వ్యవసాయ రంగంలో ఎదురవుతున్న సవాళ్లను ఎదుర్కోవడానికి అధికారులు సమన్వయంతో పనిచేసి రైతులకు మద్దతు అందించాలని రాష్ట్ర ప్రధాన కార్యదర్శి (సీఎస్) సంజయ్ జాజు ఆదేశించారు. శుక్రవారం జరిగిన వీడియో కాన్ఫరెన్స్లో పంటల వైవిధ్యీకరణ, సంక్షేమ వసతి గృహాలు, విద్యార్థులకు యూనిఫాంల పంపిణీపై కలెక్టర్లతో సమీక్షించారు.
రాష్ట్రంలో ఎల్నినో ప్రభావంతో వ్యవసాయ రంగంలో ఎదురవుతున్న సవాళ్లను సమర్థంగా ఎదుర్కొనేందుకు అధికారులు సమన్వయంతో పనిచేసి రైతులకు పూర్తి మద్దతు అందించాలని రాష్ట్ర ప్రధాన కార్యదర్శి (సీఎస్) సంజయ్ జాజు ఆదేశించారు. శుక్రవారం డా. బీఆర్ అంబేద్కర్ సచివాలయం నుంచి నిర్వహించిన వీడియో కాన్ఫరెన్స్లో పంటల వైవిధ్యీకరణ, సంక్షేమ వసతి గృహాలు, పాఠశాల విద్యార్థులకు యూనిఫాంల పంపిణీ అంశాలపై అన్ని జిల్లాల కలెక్టర్లతో సమీక్ష నిర్వహించారు.
ప్రస్తుత వాతావరణ పరిస్థితులు, మార్కెట్ ధోరణులను దృష్టిలో ఉంచుకుని రాష్ట్రవ్యాప్తంగా సుమారు 30 లక్షల ఎకరాల్లో ప్రత్యామ్నాయ పంటల సాగు ప్రణాళికలను జిల్లా, మండల, గ్రామ స్థాయిలో సిద్ధం చేయాలని సీఎస్ సూచించారు. రైతుల వద్దకు వెళ్లి అవగాహన కల్పించాలని, కనీస మద్దతు ధర (ఎంఎస్పీ)పై ఉన్న అపోహలను తొలగించాలని పేర్కొన్నారు. వరితో పాటు పత్తి సహా అనేక పంటలకు కూడా ఎంఎస్పీ వర్తిస్తుందని, మార్కెట్ ధర తగ్గితే ప్రభుత్వం కొనుగోలు చేస్తుందని రైతులకు స్పష్టంగా వివరించాలని ఆదేశించారు.
ప్రత్యామ్నాయ పంటల సాగుతో రైతుల ఆదాయం తగ్గదని, కూరగాయల సాగును ప్రోత్సహించాలని, అవసరమైన విత్తనాలు, ఎరువులు అందుబాటులో ఉంచాలని సూచించారు. అలాగే రిజర్వాయర్లలో నీటి నిల్వలను సంరక్షించే చర్యలు తీసుకోవాలని అధికారులను ఆదేశించారు.
వీడియో కాన్ఫరెన్స్ అనంతరం జిల్లా కలెక్టర్ ఆశిష్ సంగ్వాన్ జిల్లా అధికారులతో సమీక్ష నిర్వహించారు. ప్రతి విద్యార్థికి వెంటనే ఒక జత యూనిఫాం అందించి, ఆగస్టు 30 నాటికి రెండు జతల యూనిఫాంల పంపిణీ పూర్తి చేయాలని ఆదేశించారు. వస్త్రాల సరఫరాలో ఎలాంటి ఆటంకాలు లేకుండా ప్రత్యేక బృందాలతో పర్యవేక్షించాలని సూచించారు.
ఎల్నినో ప్రభావంతో నీటి సమస్యలు తలెత్తే అవకాశాలను రైతులకు వివరించి, ప్రత్యామ్నాయ పంటలు, కనీస మద్దతు ధర లభించే పంటలు, కూరగాయల సాగుపై రైతు వేదికలు, రైతు వాట్సాప్ గ్రూపుల ద్వారా విస్తృత అవగాహన కల్పించాలని వ్యవసాయ శాఖ అధికారులను కలెక్టర్ ఆదేశించారు. గత ఏడాది, ప్రస్తుత ఏడాది సాగు విస్తీర్ణంపై సమగ్ర నివేదికలు సమర్పించాలని సూచించారు.
సమావేశంలో అదనపు కలెక్టర్ ఎన్వై గిరి, జిల్లా వ్యవసాయ అధికారి మోహన్రెడ్డి, డీఆర్డీఏ పీడీ దామోదర్రెడ్డి, జిల్లా విద్యాశాఖ అధికారి మల్లికార్జున్తో పాటు వివిధ సంక్షేమ శాఖల అధికారులు పాల్గొన్నారు.
