హనుమాన్ పెద్ద జయంతి వేడుకల సందర్భంగా జగిత్యాల జిల్లాలోని కొండగట్టు క్షేత్రం భక్తుల రాకతో కిటకిటలాడుతోంది. వివిధ రాష్ట్రాలు, జిల్లాల నుంచి వేలాది మంది భక్తులు, దీక్షపరులు తరలివచ్చారు. 'జైశ్రీరామ్' నినాదాలతో ఆలయ పరిసరాలు మారుమోగుతున్నాయి.
కొండగట్టు క్షేత్రం హనుమాన్ జయంతి వేడుకలకు ముస్తాబైంది. మంగళవారం జరగనున్న ఈ ఉత్సవాల్లో పాల్గొనేందుకు భక్తులు, దీక్షపరులు పెద్ద సంఖ్యలో తరలివచ్చారు. దీంతో కొండగట్టు పరిసరాలు కాషాయమయంగా మారాయి. వివిధ ప్రాంతాల నుంచి వేలాదిగా తరలివస్తున్న భక్తుల వల్ల 'జైశ్రీరామ్' నినాదాలు మిన్నంటుతున్నాయి.
వేడుకల సందర్భంగా, ఆలయ అర్చకులు తెల్లవారుజాము నుంచే స్వామి వారికి ప్రత్యేక అభిషేకాలు, పూజలు నిర్వహించారు. ప్రభుత్వం తరపున అధికార యంత్రాంగం అంజన్నకు పట్టు వస్త్రాలను సమర్పించనుంది. అంజన్న నామస్మరణతో కొండగట్టు పరిసరాలు భక్తిశ్రద్ధలతో నిండిపోయాయి.
సోమవారం రాత్రి నుంచే కొందరు దూర ప్రాంతాల నుంచి వచ్చిన దీక్షపరులు, అంజన్నకు ముడుపులు సమర్పించి, కళ్యాణకట్ట భవనంలో మాల విరమణ చేసుకుని వెళ్తున్నారు. భక్తుల రాకతో ఆలయ ప్రాంగణం సందడిగా మారింది.
భారీగా తరలివస్తున్న భక్తులకు ఎటువంటి ఇబ్బందులు కలగకుండా జిల్లా యంత్రాంగం పకడ్బందీ ఏర్పాట్లు చేసింది. తాగునీరు, చలువ పందిళ్లు, ప్రత్యేక క్యూలైన్లు ఏర్పాటు చేయడంతో పాటు, ట్రాఫిక్ నియంత్రణకు భారీగా పోలీసులను మోహరించారు. స్వామి వారి దీక్ష విరమణ చేసే భక్తుల కోసం ప్రత్యేకంగా ఏర్పాట్లు చేసినట్లు అధికారులు తెలిపారు.
