జిల్లాలో వారం రోజులుగా కలకలం రేపుతున్న చైన్ స్నాచింగ్ ఘటనలకు సంబంధించి పోలీసులు ఒక నిందితుడిని అరెస్ట్ చేశారు. అతడిని 14 రోజుల రిమాండ్కు తరలించారు.
వరుస చైన్ స్నాచింగ్ ఘటనలతో భయాందోళనకు గురైన నిజామాబాద్ జిల్లాలో పోలీసులు ప్రత్యేక బృందాలను ఏర్పాటు చేసి నిందితుల కోసం గాలింపు చేపట్టారు. పోలీస్ కమిషనర్ ఆదేశాల మేరకు చేపట్టిన ఈ చర్యల్లో భాగంగా, ఆదివారం ఒక నిందితుడిని అదుపులోకి తీసుకున్నారు.
నిజామాబాద్ 3 టౌన్ పోలీస్ స్టేషన్ పరిధిలోని పంబోలి ప్రాంతంలో పాత నేరస్తుడైన అమన్ హుస్సైన్ ఇక్బాల్ హుస్సైన్ అలియాస్ అమన్ పటేల్ (23)ను పోలీసులు అదుపులోకి తీసుకున్నారు. విచారణలో, అతను అదిలాబాద్, నిర్మల్, నిజామాబాద్ జిల్లాలతో పాటు మహారాష్ట్రలోనూ పలు చైన్ స్నాచింగ్, దొంగతనాలు చేసినట్లు ఒప్పుకున్నాడు.
నిందితుడు నిజామాబాద్ జిల్లాలోని 4 టౌన్, 3 టౌన్, మాక్లూర్ పోలీస్ స్టేషన్ పరిధిలో నమోదైన కేసుల్లో కూడా నిందితుడిగా ఉన్నట్లు, పరారీలో ఉన్నట్లు వెల్లడించాడు. పోలీసులు అతన్ని కోర్టులో హాజరుపరచగా, న్యాయస్థానం 14 రోజుల రిమాండ్ విధించింది. చోరీ చేసిన బంగారు ఆభరణాలను మహారాష్ట్రలోని నాందేడ్, బోకర్ ప్రాంతాల్లో విక్రయించినట్లు నిందితుడు తెలిపినట్లు అధికారులు తెలిపారు.
అరెస్ట్ అయిన నిందితుడు మహారాష్ట్రలోని నాందేడ్, విష్ణు నగర్, మస్తాన్పురాకు చెందినవాడని, వృత్తిరీత్యా టైలర్ అని పోలీసులు గుర్తించారు. ఈ కేసులో మరిన్ని వివరాలు సేకరిస్తున్నట్లు తెలిపారు.
