నిజామాబాద్ నగరంలో అక్రమంగా తరలిస్తున్న ప్రజా పంపిణీ వ్యవస్థ (పీడీఎస్) బియ్యంపై పోలీసులు సోమవారం మెరుపు దాడులు నిర్వహించి భారీ మొత్తంలో బియ్యాన్ని స్వాధీనం చేసుకున్నారు. పోలీస్ కమిషనర్ పి. సాయి చైతన్య ఆదేశాల మేరకు సీసీఎస్ ఏసీపీ ఇన్చార్జి మస్తాన్ అలీ ఆధ్వర్యంలో చీత ఫోర్స్, పోలీసు సిబ్బంది ప్రత్యేక తనిఖీలు చేపట్టారు.
నగరంలోని వివిధ ప్రాంతాల్లో చేపట్టిన తనిఖీల్లో భాగంగా, 4 టౌన్ పోలీస్ స్టేషన్ పరిధిలో అనుమానాస్పదంగా వెళ్తున్న ఒక వాహనాన్ని పోలీసులు ఆపి తనిఖీ చేశారు. ఈ వాహనంలో సుమారు 30 క్వింటాళ్ల పీడీఎస్ బియ్యాన్ని అక్రమంగా తరలిస్తున్నట్లు గుర్తించి, బియ్యంతో పాటు వాహనాన్ని స్వాధీనం చేసుకున్నారు. ఈ ఘటనపై 4 టౌన్ పోలీస్ స్టేషన్ అధికారులు తదుపరి విచారణ చేపట్టారు.
ఇదే తరహాలో, టౌన్-1 పోలీస్ స్టేషన్ పరిధిలోని ముజాహిద్ నగర్ కాలనీలో అబ్దుల్ అల్తాఫ్ అనే వ్యక్తి వద్ద సుమారు 6 క్వింటాళ్ల పీడీఎస్ బియ్యాన్ని పోలీసులు స్వాధీనం చేసుకున్నారు. స్వాధీనం చేసుకున్న బియ్యాన్ని సంబంధిత పోలీసులకు అప్పగించి, కేసు నమోదు చేశారు.
మరో సంఘటనలో, టౌన్-2 పోలీస్ స్టేషన్ పరిధిలోని ముస్తహెద్పుర కాలనీలో సయ్యద్ సాజిద్ అలీ వద్ద మరో 2 క్వింటాళ్ల పీడీఎస్ బియ్యాన్ని గుర్తించి స్వాధీనం చేసుకున్నారు. ఈ వ్యవహారంపై కూడా పోలీసులు కేసు నమోదు చేసి దర్యాప్తు చేస్తున్నారు.
ప్రభుత్వం పేద ప్రజల కోసం అందిస్తున్న రేషన్ బియ్యాన్ని అక్రమంగా నిల్వ చేయడం, రవాణా చేయడం లేదా విక్రయించడం చట్టరీత్యా నేరమని పోలీసులు హెచ్చరించారు. అక్రమ రవాణాకు పాల్పడే వారిపై కఠిన చర్యలు తీసుకుంటామని తెలిపారు. ఈ ఘటనలపై కేసులు నమోదు చేసి దర్యాప్తు కొనసాగిస్తున్నట్లు అధికారులు వెల్లడించారు.
