నిజామాబాద్, July 9
పోలీసు సిబ్బందిలో వృత్తి నైపుణ్యాలను పెంపొందించి, శాస్త్రీయ దర్యాప్తు సామర్థ్యాన్ని మెరుగుపర్చే లక్ష్యంతో జోన్-2 బాసర స్థాయి పోలీస్ డ్యూటీ మీట్–2026 పోటీలను నిజామాబాద్ పోలీస్ కమిషనర్ పి. సాయి చైతన్య, ఐపీఎస్ గురువారం ప్రారంభించారు. ఈ పోటీలు తెలంగాణ పోలీసు శాఖ ఆధ్వర్యంలో జరుగుతున్నాయి.
పోలీసు సిబ్బందిలో వృత్తి నైపుణ్యాలను పెంపొందించి, శాస్త్రీయ దర్యాప్తు సామర్థ్యాన్ని మెరుగుపర్చేందుకు నిర్వహిస్తున్న జోన్-2 బాసర స్థాయి పోలీస్ డ్యూటీ మీట్–2026 పోటీలను నిజామాబాద్ పోలీస్ కమిషనర్ పి. సాయి చైతన్య, ఐపీఎస్ గురువారం ప్రారంభించారు. తెలంగాణ పోలీసు శాఖ ఆధ్వర్యంలో నిర్వహిస్తున్న మూడో పోలీస్ డ్యూటీ మీట్లో భాగంగా నిజామాబాద్ కమిషనరేట్లో ఈ పోటీలు జరుగుతున్నాయి. నిజామాబాద్, జగిత్యాల, నిర్మల్, ఆదిలాబాద్ జిల్లాలకు చెందిన కానిస్టేబుళ్ల నుంచి సీఐల వరకు వివిధ విభాగాల పోలీసు అధికారులు, సిబ్బంది ఇందులో పాల్గొన్నారు.
మారుతున్న పరిస్థితులకు అనుగుణంగా శాస్త్రీయ దర్యాప్తు పద్ధతులను అవలంబించడం ప్రతి పోలీసు అధికారికి అత్యవసరమని కమిషనర్ ఈ సందర్భంగా పేర్కొన్నారు. విధుల్లో రాణించాలంటే వృత్తి నైపుణ్యంతో పాటు నిరంతర సాధన అవసరమని చెప్పారు. పోలీసు సిబ్బందిలో దాగి ఉన్న ప్రతిభను వెలికితీసి, రాష్ట్ర స్థాయిలో మెరుగైన ప్రతిభ కనబరిచేలా తీర్చిదిద్దడమే డ్యూటీ మీట్ ప్రధాన ఉద్దేశమని తెలిపారు.
పోటీల్లో భాగంగా నేరస్థల పరిశీలన, క్లూస్ సేకరణ, శాస్త్రీయ దర్యాప్తు, ఫోరెన్సిక్ సైన్స్, ఫింగర్ ప్రింట్స్, కంప్యూటర్స్, డాగ్ స్క్వాడ్, ప్రొఫెషనల్ ఫోటోగ్రఫీ, పేలుడు పదార్థాల గుర్తింపు, నార్కోటిక్స్, ఫోరెన్సిక్ మెడిసిన్ తదితర అంశాల్లో ఎంపిక పరీక్షలు నిర్వహించారు. ఈ పోటీలు రెండు రోజుల పాటు కొనసాగనున్నాయి.
ఈ కార్యక్రమంలో అదనపు డీసీపీ (అడ్మిన్) ఎన్. శుభం ప్రకాష్, ఏసీపీలు ప్రకాష్ యాదవ్, రాజశేఖర్, శ్రీశైలం, గురునాయుడు, నరేందర్, అసిస్టెంట్ ప్రొఫెసర్ డాక్టర్ నాగేంద్రబాబు, అలాగే నిజామాబాద్, జగిత్యాల, నిర్మల్, ఆదిలాబాద్ జిల్లాలకు చెందిన సీఐలు, ఎస్ఐలు, పోలీసు సిబ్బంది పాల్గొన్నారు.
