తాండూర్: 18 క్వింటాళ్ల రేషన్ బియ్యం పట్టివేత

తాండూర్ మండలంలోని కిష్టంపేట ఎస్సీ కాలనీలో ఈ సంఘటన చోటుచేసుకుంది. మోటం దేవేందర్ అనే వ్యక్తి, ప్రభుత్వం పేదలకు పంపిణీ చేస్తున్న రేషన్ బియ్యాన్ని కొనుగోలు చేసి తన ఇంట్లో నిల్వ ఉంచుకున్నట్లు అధికారులు తెలిపారు.

సమాచారం అందుకున్న ఎస్సై ప్రసాద్ ఆధ్వర్యంలో అధికారులు వెంటనే రంగంలోకి దిగి, నిందితుడి ఇంట్లో తనిఖీలు చేపట్టారు. ఈ తనిఖీల్లో 18 క్వింటాళ్ల రేషన్ బియ్యాన్ని అధికారులు గుర్తించి స్వాధీనం చేసుకున్నారు.

అక్రమంగా రేషన్ బియ్యాన్ని నిల్వ ఉంచిన మోటం దేవేందర్‌పై అధికారులు కేసు నమోదు చేశారు. స్వాధీనం చేసుకున్న బియ్యాన్ని ఎంఎల్ఎస్ పాయింట్‌కు తరలించినట్లు ఎస్సై ప్రసాద్ వెల్లడించారు.

ప్రభుత్వ పథకాలను దుర్వినియోగం చేసే వారిపై కఠిన చర్యలు తీసుకుంటామని అధికారులు హెచ్చరించారు. రేషన్ బియ్యం అక్రమ రవాణా, నిల్వలపై నిఘా పెంచినట్లు తెలిపారు.