ఐదు రాష్ట్రాల అసెంబ్లీ ఎన్నికల అనంతరం తెలంగాణపై దృష్టి సారిస్తామని బీజేపీ రాజ్యసభ సభ్యుడు కె. లక్ష్మణ్ తెలిపారు. బుధవారం హైదరాబాద్లోని బీజేపీ రాష్ట్ర కార్యాలయంలో విలేకరులతో ఆయన మాట్లాడుతూ, గత అసెంబ్లీ ఎన్నికల్లో రేవంత్ రెడ్డి వైపు ప్రజల మద్దతు వీచిందని పేర్కొన్నారు.
ఎంపీ లక్ష్మణ్ మాట్లాడుతూ, ఢిల్లీ అసెంబ్లీ ఎన్నికల్లో బీజేపీ విజయం అనూహ్యమని, అయితే తెలంగాణ ప్రజలు తెలివైన వారని అభిప్రాయపడ్డారు. లోక్సభ ఎన్నికల్లో తమ పార్టీకి 8 సీట్లు వచ్చినా, 38 శాతం ఓట్లు ప్రజలు అందించారని ఆయన వివరించారు.
రాబోయే జీహెచ్ఎంసీ ఎన్నికల్లో బీజేపీదే విజయమని లక్ష్మణ్ జోస్యం చెప్పారు. మహిళా బిల్లు, డీలిమిటేషన్ బిల్లు వంటి అంశాల తర్వాత రాజకీయ సమీకరణాలు మారతాయని, మహిళా బిల్లును ప్రతిపక్షాలు అడ్డుకుంటున్నాయనే విషయం ప్రజల్లోకి వెళ్లిందని తెలిపారు.
ప్రజాస్వామ్యంలో ఎవరైనా పార్టీ పెట్టుకోవచ్చని, అయితే ప్రజలు అమాయకులు కాదని లక్ష్మణ్ అన్నారు. తమిళనాడులో విజయ్ పార్టీ సమావేశాలకు భారీగా ప్రజలు వస్తున్నా, ఆ పార్టీ ఎక్కువ సీట్లు గెలిచే అవకాశం లేదని ఆయన అభిప్రాయపడ్డారు.
తెలంగాణలో హెట్ స్పీచ్ బిల్లు తెచ్చి పకడ్బందీగా అమలు చేస్తామని గతంలో సీఎం రేవంత్ రెడ్డి ప్రకటించారని లక్ష్మణ్ గుర్తు చేశారు. ముస్లింలను రెచ్చగొట్టే వ్యాఖ్యలపై సీఎం రేవంత్ సమాధానం చెప్పాలని డిమాండ్ చేశారు. బీఆర్ఎస్ పార్టీ తెలంగాణలో నిలదొక్కుకోవడం అంత సులభం కాదని, కవిత ప్రస్తావిస్తున్న అంశాలను బీఆర్ఎస్లో ఉన్నప్పుడే మాట్లాడి ఉంటే బాగుండేదని లక్ష్మణ్ అభిప్రాయపడ్డారు.
