పశ్చిమ బెంగాల్ ప్రభుత్వం రాష్ట్రంలోని అన్ని ప్రభుత్వ పాఠశాలలు మరియు ప్రభుత్వ సహాయం పొందుతున్న మదర్సాలలో తరగతులు ప్రారంభమయ్యే ముందు 'వందేమాతరం' గీతాన్ని ఆలపించడాన్ని తప్పనిసరి చేస్తూ ఉత్తర్వులు జారీ చేసింది. ఈ నిర్ణయం విద్యా సంస్థల్లో జాతీయ భావనను పెంపొందించే లక్ష్యంతో తీసుకున్నట్లు ప్రభుత్వం తెలిపింది.
రాష్ట్ర మైనారిటీ వ్యవహారాలు, మదర్సా విద్యాశాఖ మంత్రి ఖుదీరామ్ టుడు ఈ ఉత్తర్వులను అధికారికంగా ప్రకటించారు. ఈ ఆదేశాల ప్రకారం, ప్రతి మదర్సాలో ప్రార్థన సమయంలో జాతీయ గీతాన్ని ఆలపించడం తప్పనిసరి అవుతుంది. ప్రభుత్వం నుంచి ఆర్థిక సహాయం పొందుతున్న అన్ని విద్యా సంస్థలు ఈ నిబంధనను పాటించాల్సి ఉంటుంది.
ఇతర ప్రభుత్వ పాఠశాలల్లో 'వందేమాతరం' తప్పనిసరి అయినప్పుడు, మదర్సాలలో దీనిని అమలు చేయడంలో ఎందుకు అభ్యంతరం ఉండాలని మంత్రి ఖుదీరామ్ టుడు ప్రశ్నించారు. విద్యార్థులలో చిన్నతనం నుండే క్రమశిక్షణతో పాటు దేశం పట్ల గౌరవాన్ని పెంపొందించడమే ఈ చర్యల వెనుక ముఖ్య ఉద్దేశమని ప్రభుత్వం వెల్లడించింది.
ఈ నిర్ణయం రాష్ట్రంలో రాజకీయ చర్చకు దారితీసింది. బీజేపీ నాయకులు ఈ ఉత్తర్వులను విద్యా రంగంలో ఒక కొత్త ఒరవడికి నాందిగా అభివర్ణించారు. విద్యా సంస్థలన్నింటినీ ఒకే తాటిపైకి తెచ్చే ప్రయత్నంలో భాగంగానే ఈ ఉత్తర్వులు తీసుకొచ్చినట్లు వారు తెలిపారు. అయితే, మరికొందరు ఈ ప్రభుత్వ నిర్ణయంపై భిన్నవాదనలు వినిపిస్తున్నారు.
