కామారెడ్డి జిల్లాలోని 331 అంగన్వాడీ కేంద్రాల్లో మౌలిక సదుపాయాల కల్పనలో భాగంగా, శుద్ధమైన తాగునీటి సరఫరా కోసం ఆర్ఓ యంత్రాల ఏర్పాటు, పిల్లల్లో సృజనాత్మకతను పెంచేందుకు బాలా పెయింటింగ్ పనుల కోసం తెలంగాణ ప్రభుత్వం టెండర్లను ఆహ్వానించింది.
మహిళలు, పిల్లలు, వికలాంగులు మరియు వృద్ధుల సంక్షేమ శాఖ ఆధ్వర్యంలో చేపడుతున్న ఈ అభివృద్ధి పనులకు సుమారు రూ.82.75 లక్షలు అంచనా వ్యయంగా నిర్ణయించారు. ఈ టెండర్ ప్రక్రియ ఐదు ఐసీడీఎస్ ప్రాజెక్టుల పరిధిలోని కేంద్రాలకు వర్తిస్తుంది.
అర్హత కలిగిన ఏజెన్సీలు, వ్యాపారస్తులు తమ టెండర్లను సీల్డ్ కవర్లలో మార్చి 25వ తేదీ మధ్యాహ్నం 12:30 గంటలలోపు సమర్పించాల్సి ఉంటుంది. అదే రోజు మధ్యాహ్నం 2:30 గంటలకు టెండర్లను తెరవనున్నట్లు జిల్లా సంక్షేమ అధికారి తెలిపారు.
టెండర్ దరఖాస్తుతో పాటు, నిర్దేశిత మొత్తంలో ఈఎండీ (Earnest Money Deposit) మరియు ప్రాసెసింగ్ ఫీజులను జిల్లా సంక్షేమ అధికారి పేరు మీద డిమాండ్ డ్రాఫ్ట్ రూపంలో చెల్లించాల్సి ఉంటుందని అధికారులు స్పష్టం చేశారు. ఈ రుసుములను చెల్లించని దరఖాస్తులను పరిగణనలోకి తీసుకోబోమని తెలిపారు. ఈఎండీ విషయంలో ఎలాంటి మినహాయింపులు ఉండవని కూడా వెల్లడించారు.
