తెలంగాణలో 10 కులాలదే 60% జనాభా: స్వతంత్ర నిపుణుల కమిటీ నివేదిక

తెలంగాణలో మొత్తం 242 కులాలు ఉండగా, ఇందులో 10 సామాజికవర్గాలు రాష్ట్ర జనాభాలో 60 శాతానికిపైగా ఉన్నాయని ప్రభుత్వం చేపట్టిన కులగణన సర్వే-2024లో తేలిందని స్వతంత్ర నిపుణుల కమిటీ వెల్లడించింది. ఈ పది కులాల్లో మాదిగ, ముస్లిం, ముదిరాజ్‌, లంబాడీ, యాదవ, రెడ్డి, గౌడ, మాల, మున్నూరు కాపు, పద్మశాలి ఉన్నట్లు నివేదిక పేర్కొంది. 10 లక్షలకు మించి జనాభా ఉన్న కులాలు 10 ఉండగా, 5-10 లక్షల మధ్య జనాభా ఉన్న కులాలు 6, లక్ష నుంచి 5 లక్షల మధ్య జనాభా ఉన్న కులాలు 24, 50 వేల నుంచి లక్ష మధ్య జనాభా ఉన్న కులాలు 16, 50 వేలలోపు జనాభా ఉన్న కులాల సంఖ్య 186 ఉన్నట్లు నిపుణుల కమిటీ తన నివేదికలో పేర్కొంది.

సుమారు 3.55 కోట్ల మంది ప్రజల అభిప్రాయాలను, వారి జీవన ప్రమాణాలను విశ్లేషించిన స్వతంత్ర నిపుణుల బృందం తన నివేదికను ప్రభుత్వానికి సమర్పించింది. రాష్ట్రంలో వెనుకబాటుతనం కేవలం జనాభా ప్రాతిపదికన కాకుండా వారు ఎలా జీవిస్తున్నారనే అంశంపై ఆధారపడి ఉందని నివేదిక వెల్లడించింది. రాష్ట్ర జనాభాలో అగ్రభాగం బీసీలదేనని, రాష్ట్ర మొత్తం జనాభాలో బీసీ, ఎస్సీ, ఎస్టీల వాటా 84.2 శాతం ఉందని, ఒక్క బీసీలే 56.4 శాతంతో అత్యధిక జనాభా కలిగిన సమూహంగా నిలిచారని నివేదిక పేర్కొంది. ఎస్సీలు 17.4 శాతం., ఎస్టీలు 10.4 శాతం, ఓసీలు 11.9 శాతం ఉన్నారని తెలిపింది.

‘కాంపోజిట్‌ బ్యాక్‌వర్డ్‌నెస్‌ ఇండెక్స్‌’ (సీబీఐ) పేరిట 42 రకాల అంశాలను పరిగణనలోకి తీసుకుని లెక్కించారు. ఓసీల వెనుకబాటుతనం సూచిక 31 పాయింట్లుగా ఉంటే, ఎస్సీలది 96, ఎస్టీలది 95 పాయింట్లుగా ఉంది. అంటే ఓసీల కంటే ఎస్సీ, ఎస్టీలు మూడు రెట్లు ఎక్కువ వెనుకబడి ఉన్నారు. అలాగే బీసీల వెనుకబాటుతనం 86 పాయింట్లు ఉండగా, రాష్ట్ర సగటు 81 పాయింట్లుగా నమోదైంది. వెనుకబాటుతనాన్ని నిర్ణయించడంలో విద్య అత్యంత కీలకమైన అంశమని నివేదిక తేల్చింది. ఇంగ్లిష్‌ మీడియం విద్య అందుబాటులో ఉన్న కులాలు సామాజికంగా మెరుగైన స్థితిలో ఉన్నాయని పేర్కొంది. పేదరికంలో ఉన్నప్పటికీ ఓసీ వర్గాలకు చెందిన 34 శాతం మంది పిల్లలు ప్రైవేట్‌ పాఠశాలలకు వెళ్తుండగా.. ఎస్సీ, ఎస్టీల్లో ఆ సంఖ్య 5 శాతంమాత్రమే ఉందని తెలిపింది.

ఎస్సీ, ఎస్టీల్లో 45 శాతం మంది దినసరి కూలీలుగా జీవనం సాగిస్తుండగా, ఓసీల్లో కేవలం 9 శాతమే ఉన్నట్లు వెల్లడించింది. ప్రైవేట్‌ రంగ వృత్తుల్లో 30 శాతం వాటా ఓసీలదే కాగా, ఎస్టీల వాటా 4 శాతం, ఎస్సీల వాటా 14 శాతంగా ఉందని నివేదిక పేర్కొంది. రాష్ట్రంలో 1.1 కోట్ల మంది రూ.2 లక్షలలోపు వార్షిక ఆదాయంతో గడుపుతుండగా, ఇందులో 58 శాతం మంది బీసీలే ఉండటం ఆందోళనకరమని నిపుణుల బృందం పేర్కొంది. పట్టణీకరణ పెరిగినప్పటికీ కుల వివక్ష తగ్గలేదని, గ్రామీణ, పట్టణ ప్రాంతాల్లో సామాజిక వెనుకబాటుతనం మధ్య అంతరం అలాగే ఉందని నివేదిక స్పష్టం చేసింది. ప్రభుత్వ పథకాలలోనూ కులాల వారీగా లబ్ధి భిన్నంగా ఉందని నివేదిక తెలిపింది.