శ్రీ కొమురవెల్లి మల్లికార్జున స్వామి కళ్యాణ మహోత్సవానికి పటిష్టమైన బందోబస్తు ఏర్పాటు
సిద్దిపేట, డిసెంబర్ 28 (ప్రశ్న ఆయుధం ):
శ్రీ కొమురవెళ్లి మల్లికార్జున స్వామి కళ్యాణ మహోత్సవం సందర్భంగా ఆదివారం పటిష్టమైన బందోబస్తు ఏర్పాటు చేస్తున్నట్టు ఏఆర్ అడిషనల్ డీసీపీ రామచంద్రరావు, హుస్నాబాద్ ఏసీపి సతీష్, సిద్దిపేట ఏసీపీ మధు, గజ్వేల్ ఎసిపి పురుషోత్తం రెడ్డి, టాస్క్ ఫోర్స్ ఏసిపి రవీందర్ చెప్పారు. శనివారం పోలీస్ కమిషనర్ ఆదేశానుసారం చేర్యాల సిఐ శ్రీను, కొమురవెల్లి ఎస్ఐ రాజుతో కలసి దేవుడు కళ్యాణం జరుగు తోటబావి, పరిసర ప్రాంతాలైన వీఐపీ పార్కింగ్, జనరల్ పార్కింగ్ దర్శన ప్రదేశాలను పరిశీలించారు.
ఈ సందర్భంగా ఏఆర్ అడిషనల్ డీసీపీ రామచంద్రరావు, హుస్నాబాద్ ఎసిపి సతీష్ శ్రీ కొమురవెల్లి మల్లికార్జున స్వామి కళ్యాణం మహోత్సవం బందోబస్తుకు వచ్చిన పోలీస్ అధికారులకు, సిబ్బందికి కళ్యాణోత్సవం, పార్కింగ్, టెంపుల్ ఆవరణ, గర్భగుడి దర్శనం, తదితర అంశాల గురించి దిశా నిర్దేశం చేశారు. రేపు ఉదయం 6 గంటలకు అధికారులు సిబ్బందికి కేటాయించిన ప్రదేశంలో విధి నిర్వహణలో ఉండాలని ఆదేశించారు. ఇన్చార్జి అధికారులందరూ తప్పకుండా విహెచ్ఎఫ్ సెర్చ్ యాండిల్ చేయాలని సూచించారు. ప్రతి ఒక్కరూ సరియైన సమయానికి వచ్చి విధులు నిర్వహించాలని, దర్శనానికి వచ్చే ప్రజలతో మర్యాదగా ప్రవర్తించాలని సూచించారు. మన వల్ల ఎవరికి ఇబ్బంది కలగకుండా క్రమశిక్షణతో విధులు నిర్వహించాలని కోరారు. బందోబస్తు విషయంలో కానీ ఏ విషయంలోనైనా ఎలాంటి సమస్యలు ఉన్నా సంబంధిత అధికారులకు తెలియపరచాలని సూచించారు. దేవుని కళ్యాణంలో విధులు నిర్వహించడం అదృష్టంగా భావించాలని చెప్పారు. ఈ బ్రహ్మోత్సవాలు మూడు నెలల పాటు ప్రతి ఆదివారం నిర్వహించడం జరుగుతుందన్నారు. శ్రీ కొమురవెల్లి మల్లికార్జున స్వామి కళ్యాణ మహోత్సవం సందర్భంగా పోలీస్ కమిషనర్ గారి ఆదేశానుసారం ఎలాంటి అవాంఛనీయ సంఘటన జరగకుండా పటిష్టమైన బందోబస్తు ఏర్పాటు చేయడం జరుగుతుందని తెలిపారు.
*బందోబస్తును 4 సెక్టార్లుగా విభజించడం జరిగింది*
1. కళ్యాణ మహోత్సవం వేదిక తోటబావి వద్ద 2. టెంపుల్ ఆవరణలో గర్భగుడి దర్శనం, 3. ట్రాఫిక్, 4. పార్కింగ్ ప్రదేశాలు
*పార్కింగ్ ప్రదేశాలు*
తోటబావి సమీపంలో ఎడమవైపు చుట్టు కాంపౌండ్ వాళ్ళు ఉన్న ప్రదేశంలో విఐపి పార్కింగ్ ఏర్పాటు చేయడం జరిగిందన్నారు. సిద్దిపేట, చేర్యాల, కిష్టంపేట మరియు కొమురవెల్లి కమాన్ నుండి వచ్చే వాహనదారులు బస్టాండ్ పక్కన ఉన్న ఖాళీ ప్రదేశంలో వాహనాల పార్కింగ్ ఏర్పాటు చేశామన్నారు.
హైదరాబాద్, కొండపోచమ్మ టెంపుల్ నుండి, ఐనాపూర్ గ్రామం వచ్చే వాహనదారులకు కొమురవెల్లి పెట్రోల్ పంపు వెనుక ఉన్న ఖాళీ ప్రదేశంలో, శ్రీ హోటల్ వెనుక ఉన్న ఖాళీ ప్రదేశంలో పార్కింగ్ ఏర్పాటు చేయడం జరిగిందన్నారు. శ్రీ కొమరవెల్లి మల్లికార్జున స్వామి కళ్యాణానికి వచ్చే భక్తులు పోలీసుల సలహాలు, సూచనలు పాటించి వాహనాలు పార్కింగ్ ప్రదేశంలో పార్కు చేసి ప్రశాంతంగా దేవుని దర్శనం చేసుకుని వెళ్లాలని సూచించారు. రోడ్డుకు అడ్డదిడ్డంగా వాహనాలు పెడితే వచ్చిపోయే భక్తులకు ప్రజలకు ఇబ్బందిగా ఉంటుందని అట్టి వాహనాలను సీజ్ చేస్తామని తెలిపారు.
