కామారెడ్డి జిల్లాలో మే 13 నుండి 21 వరకు జరగనున్న సప్లిమెంటరీ ఇంటర్మీడియట్ పరీక్షల నిర్వహణకు సంబంధించిన ఏర్పాట్లపై జిల్లా కలెక్టర్ ఆశిష్ సాంగ్వాన్ సోమవారం సమీక్ష సమావేశం నిర్వహించారు. పరీక్షలను ప్రశాంతంగా, పారదర్శకంగా నిర్వహించాలని అధికారులకు సూచించారు.
జిల్లా కలెక్టరేట్ సమావేశ మందిరంలో జరిగిన ఈ సమావేశంలో చీఫ్ సూపరింటెండెంట్లు, సంబంధిత శాఖల అధికారులు పాల్గొన్నారు. పరీక్షలు 31 కేంద్రాలలో రెండు షిఫ్టులలో నిర్వహించబడతాయి.
కలెక్టర్ ఆశిష్ సాంగ్వాన్ మాట్లాడుతూ, పరీక్షా కేంద్రాల్లో తాగునీరు, విద్యుత్, ఫర్నిచర్, పారిశుద్ధ్యం వంటి మౌలిక సదుపాయాలు కల్పించాలని ఆదేశించారు. ఎటువంటి అవాంఛనీయ సంఘటనలు జరగకుండా పోలీసు, వైద్య, విద్యుత్ శాఖలతో సమన్వయం చేసుకోవాలని సూచించారు.
పరీక్షా నిర్వహణలో అధికారులు బాధ్యతాయుతంగా వ్యవహరించాలని, పరీక్షలు సజావుగా జరిగేలా చూడాలని కలెక్టర్ తెలిపారు. ఈ సమీక్షా సమావేశంలో పలువురు అధికారులు పాల్గొన్నారు.
