కామారెడ్డి, జూలై 13
ప్రైవేట్ కార్పొరేట్ సంస్థలు ప్రభుత్వ స్థలాలను ఆక్రమించుకుంటే సహించేది లేదని జిల్లా కలెక్టర్ స్పష్టం చేశారు. భిక్నూర్ లోని శ్రీ చైతన్య విద్యానికేతన్ హై స్కూల్ ప్రభుత్వ ఆస్తులను ఆక్రమించుకోవడం, పన్నులు చెల్లించకపోవడంపై ప్రజావాణిలో ఫిర్యాదు అంది 15 రోజులు గడుస్తున్నా చర్యలు తీసుకోని అధికారులపై ఆయన తీవ్ర అసహనం వ్యక్తం చేశారు.
ప్రైవేట్ కార్పొరేట్ సంస్థలు ప్రభుత్వ స్థలాలను ఎట్టి పరిస్థితుల్లోనూ వాడుకోవడానికి వీల్లేదని, అలాంటి చర్యలను ఏమాత్రం సహించేది లేదని జిల్లా అత్యున్నత పరిపాలనాధికారి (కలెక్టర్) గారు ఖచ్చితమైన ప్రకటన చేశారు. ప్రజావాణిలో సాక్ష్యాధారాలతో ఫిర్యాదు సమర్పించి 15 రోజులు కావస్తున్నా క్రింది స్థాయి అధికారులు ఎలాంటి చర్యలు తీసుకోకపోవడంపై ఆయన తీవ్ర అసహనం వ్యక్తం చేశారు. ఈ నిర్లక్ష్య వైఖరిపై జిల్లా పంచాయతీ అధికారి (DPO), జిల్లా విద్యాశాఖాధికారి (DEO) లను కలెక్టర్ గారు వివరణ కోరారు. ఈ మొత్తం ఉదంతంపై వీలైనంత త్వరగా సమగ్ర విచారణ చేపట్టి నివేదిక సమర్పించాలని, అక్రమాలకు పాల్పడినట్టు తెలితే విద్యాసంస్థపై కఠిన చర్యలు తీసుకోవాలని ఆదేశాలు జారీ చేయడంతో జిల్లా యంత్రాంగంలో ఒక్కసారిగా చలనం మొదలైంది.
భిక్నూర్ పట్టణ కేంద్రంలోని విలువైన గ్రామ పంచాయతీ మార్కెట్ స్థలాన్ని గత 15 సంవత్సరాలుగా ఎటువంటి లీజు ఒప్పందం లేకుండా శ్రీ చైతన్య పాఠశాల యాజమాన్యం తమ స్వంత కమర్షియల్ అవసరాలకు ఆక్రమించినట్లు సాక్ష్యాలు ఉన్నా అధికారులు నాన్చడంపై కలెక్టర్ గారు ఆగ్రహం వ్యక్తం చేశారు. 500 మంది విద్యార్థులకు కేవలం 5 మరుగుదొడ్లు ఉంచి బాలల హక్కులను కాలరాస్తున్నా, విద్యా హక్కు చట్టం (RTE) ప్రకారం సొంత ఆటస్థలం, క్వాలిఫైడ్ టీచర్లు లేకుండా విద్యాబోధన సాగిస్తున్నా డీపీఓ, డీఈఓ కార్యాలయాలు ఎందుకు నిమ్మకు నీరెత్తినట్లు వ్యవహరించాయని ప్రశ్నించారు. ప్రజావాణి ఫిర్యాదును పక్కన పెట్టడం వెనుక ఉన్న నిర్లక్ష్యంపై తీవ్ర అసహనం వ్యక్తం చేసిన కలెక్టర్ గారు, తక్షణమే విచారణ ప్రక్రియను ముగించాలని ఆదేశించారు.
స్థానిక అధికారులు ప్రజా ప్రతినిధుల ఒత్తిళ్లకు లొంగి ఫైళ్లను పక్కన పెట్టడం వల్లే ఈ 15 రోజుల కాలయాపన జరిగిందని సామాజిక కార్యకర్త బత్తుల భిక్షపతి ఆరోపించారు. కలెక్టర్ స్పందించి అధికారులను వివరణ కోరడం శుభపరిణామమని పేర్కొన్న ఆయన, ఈ విచారణను మరింత పారదర్శకంగా జరపడానికి జిల్లా స్థాయి ఉన్నత అధికారుల చేత విచారణ జరిపించాలని తన వినతి పత్రంలో కోరారు. సదరు కార్పొరేట్ స్కూల్ నుండి కట్టని లక్షలాది రూపాయల పన్నులను తక్షణమే రొక్కం రూపంలో వసూలు చేసి, ఆ నిధులను పూర్తిస్థాయిలో భిక్నూర్ గ్రామాభివృద్ధికి, మౌలిక వసతుల కల్పనకు ఖర్చు చేయాలని ఆయన జిల్లా పాలనాధికారిని అభ్యర్థించారు.
ఒకవేళ కలెక్టర్ తాజా ఆదేశాల తర్వాత కూడా విద్యాశాఖ, పంచాయతీ రాజ్ అధికారులు లాలూచీపడి శ్రీ చైతన్య విద్యాసంస్థపై కఠిన చర్యలు తీసుకోకపోతే, భిక్నూర్ లోని రైతులు ఎవ్వరూ పంచాయతీకి పన్నులు కట్టడానికి సిద్ధంగా లేరని రైతాంగం స్పష్టం చేసింది. సామాన్య రైతు గంపకు 20 రూపాయల చొప్పున సంవత్సరానికి 8 నుండి 10 లక్షల రూపాయల ఆదాయాన్ని రాబట్టే అధికారులు, కార్పొరేట్ సంస్థల లక్షల రూపాయలను వదిలేస్తే చూస్తూ ఊరుకోబోమన్నారు. కలెక్టర్ ఆదేశాల మేరకు వీలైనంత త్వరలో విచారణ జరిగి స్కూల్ అనుమతులు రద్దవుతాయా, లేక పన్నులు కట్టి బతుకుతుందా అనేది భిక్నూర్ లో ఇప్పుడు ఉత్కంఠ రేపుతోంది. ఏం జరుగుతుందో వేచి చూడాలి!
