సంగారెడ్డి జిల్లాలో అంగన్వాడీ టీచర్ల నైపుణ్యాలను పెంపొందించడం, పూర్వ ప్రాథమిక విద్యలో ఉత్తమ పద్ధతులను పరస్పరం పంచుకోవడం లక్ష్యంగా జిల్లా స్థాయి 10వ వార్షిక సదస్సును నిర్వహించారు. ఈ సదస్సులో సుమారు 350 మంది టీచర్లు పాల్గొన్నారు.
జిల్లా కలెక్టరేట్ ఆడిటోరియంలో మహిళా అభివృద్ధి & శిశు సంక్షేమ శాఖ, అజీం ప్రేమ్ జీ ఫౌండేషన్ సంయుక్తంగా "పూర్వ బాల్య సంరక్షణ మరియు విద్య" కార్యక్రమంలో భాగంగా ఈ సదస్సును ఏర్పాటు చేశారు. జిల్లా కలెక్టర్ ప్రావీణ్య ఈ కార్యక్రమానికి నేతృత్వం వహించారు.
జిల్లా సంక్షేమ అధికారి లలిత కుమారి మాట్లాడుతూ, ఈ సదస్సు గత 10 సంవత్సరాలుగా టీచర్లు తమ అనుభవాలను, ఉత్తమ పద్ధతులను పంచుకోవడానికి వేదికగా నిలుస్తోందని తెలిపారు. ఈ ఏడాది 5 ఐసీడీఎస్ ప్రాజెక్టుల నుండి 350 మందికి పైగా టీచర్లు హాజరయ్యారు.
సదస్సులో యాన్యువల్ డే, ఎన్రోల్మెంట్ డ్రైవ్, ECCE డే మీటింగ్స్, కథల పుస్తకాలు, ఆటల ద్వారా పిల్లల అభివృద్ధి వంటి అంశాలపై చర్చలు జరిగాయి. 412 వ్యాసాల నుండి ఎంపికైన 12 పేపర్ ప్రెజెంటేషన్స్, 18 పోస్టర్ ప్రెజెంటేషన్స్ ద్వారా టీచర్లు తమ పద్ధతులను వివరించారు.
అజీం ప్రేమ్ జీ ఫౌండేషన్ ప్రతినిధి ఎంఎస్ రావు మాట్లాడుతూ, అంగన్వాడీ టీచర్ల నైపుణ్యాభివృద్ధికి ఇలాంటి సదస్సులు ఎంతో ప్రయోజనకరమని, కథలు, ఆటల ద్వారా బోధన పిల్లల సమగ్ర అభివృద్ధికి దోహదపడుతుందని అన్నారు. ఉత్తమ ప్రెజెంటేషన్లు ఇచ్చిన టీచర్లకు సర్టిఫికెట్లు అందజేశారు.
