కేంద్రంలోని నరేంద్ర మోదీ ప్రభుత్వం అమలు చేస్తున్న రైతు, కార్మిక, ప్రజా వ్యతిరేక విధానాలను తక్షణమే విరమించుకోవాలని సీపీఐ(ఎంఎల్) మాస్ లైన్ పార్టీ డిమాండ్ చేసింది. పార్టీ జాతీయ కమిటీ పిలుపు మేరకు నిజామాబాద్ అర్బన్ జిల్లా కమిటీ ఆధ్వర్యంలో శుక్రవారం ధర్నా చౌక్ వద్ద నిరసన ప్రదర్శన నిర్వహించారు.
ఈ సందర్భంగా పార్టీ జిల్లా కార్యదర్శి వనమాల కృష్ణ మాట్లాడుతూ, పెట్రోల్, డీజిల్, గ్యాస్తో పాటు నిత్యావసర వస్తువుల ధరలను కేంద్ర ప్రభుత్వం అమాంతం పెంచిందని విమర్శించారు. అంతర్జాతీయ మార్కెట్లో క్రూడ్ ఆయిల్ ధరలు తగ్గినా దేశంలో ఇంధన ధరలు తగ్గించకపోవడం అన్యాయమని ఆయన అన్నారు. ప్రజలపై భారం తగ్గించేలా వెంటనే పెట్రోల్, డీజిల్, గ్యాస్ ధరలను తగ్గించాలని పార్టీ డిమాండ్ చేసింది.
ఎస్ఐఆర్ పేరుతో ఓటు హక్కును హరించే కుట్రలు జరుగుతున్నాయని ఆరోపిస్తూ, ఆ విధానాన్ని తక్షణమే రద్దు చేయాలని పార్టీ కోరింది. కార్మికులకు వ్యతిరేకంగా తీసుకొచ్చిన నాలుగు లేబర్ కోడ్లను కూడా ఉపసంహరించుకోవాలని డిమాండ్ చేశారు.
మోదీ ప్రభుత్వ విధానాల వల్ల దేశ ఆర్థిక వ్యవస్థతో పాటు ప్రజల జీవన పరిస్థితులు దెబ్బతిన్నాయని పార్టీ నాయకులు ఆవేదన వ్యక్తం చేశారు. కేంద్ర ప్రభుత్వం ఇప్పటికైనా రైతు, కార్మిక, ప్రజా వ్యతిరేక విధానాలను విడనాడాలని, లేకపోతే ప్రజా సంఘాలు, వామపక్షాలు, ప్రతిపక్ష పార్టీలు కలిసి ఉద్యమాలను మరింత ఉద్ధృతం చేస్తాయని హెచ్చరించారు.
