పెట్రోల్, డీజిల్ ధరల పెంపుపై కేంద్ర ప్రభుత్వం అధికారిక ప్రకటన

సోషల్ మీడియాలో ఇటీవల ప్రచారంలో ఉన్న పెట్రోల్, డీజిల్ ధరల పెంపు వార్తలపై కేంద్ర ప్రభుత్వం స్పందించింది. ఇంధన ధరల పెంపుపై వస్తున్న వార్తలు కేవలం పుకార్లు మాత్రమేనని, ప్రజలు వీటిని నమ్మవద్దని మంత్రిత్వ శాఖ కోరింది.

ప్రభుత్వం వద్ద ప్రస్తుతానికి పెట్రోల్, డీజిల్ ధరలను పెంచే ఆలోచన గానీ, ప్రతిపాదన గానీ లేదని అధికారికంగా వెల్లడించింది. సామాన్యులపై ఇంధన భారం మోపే ఉద్దేశ్యం ప్రభుత్వానికి లేదని స్పష్టతనిచ్చింది.

అంతర్జాతీయంగా ముడిచమురు ధరలు విపరీతంగా పెరుగుతున్నప్పటికీ, గత నాలుగేళ్లుగా దేశీయంగా పెట్రోల్, డీజిల్ ధరలను స్థిరంగా ఉంచడంలో భారత్ సఫలీకృతమైందని మంత్రిత్వ శాఖ పేర్కొంది. రష్యా-ఉక్రెయిన్ యుద్ధం వంటి భౌగోళిక ఉద్రిక్తతల నేపథ్యంలో ప్రపంచవ్యాప్తంగా ఇంధన ధరలు పెరిగినప్పటికీ, భారత ప్రభుత్వం పన్నుల తగ్గింపు వంటి చర్యల ద్వారా ధరలను నియంత్రించగలిగింది.

ఈ ప్రకటనతో ఇంధన ధరల పెంపుపై నెలకొన్న అనిశ్చితికి తెరదించుతూ, ప్రజలకు ఉపశమనం కలిగించింది.