కేసీఆర్ నాయకత్వంలోనే తెలంగాణ ఆత్మగౌరవం, అభివృద్ధి: జీవన్ రెడ్డి

నిజామాబాద్ జిల్లా బీఆర్ఎస్ పార్టీ కార్యాలయంలో మంగళవారం తెలంగాణ రాష్ట్ర ఆవిర్భావ దినోత్సవ వేడుకలు ఘనంగా జరిగాయి. ఈ సందర్భంగా జాతీయ పతాకాన్ని ఆవిష్కరించి, తెలంగాణ తల్లి విగ్రహానికి పూలమాలలు సమర్పించారు. రాష్ట్ర సాధన కోసం ప్రాణాలు అర్పించిన అమరవీరులకు నివాళులర్పించారు.

మాజీ ఎమ్మెల్యే జీవన్ రెడ్డి మాట్లాడుతూ, కేసీఆర్ నాయకత్వంలో తెలంగాణ ప్రత్యేక రాష్ట్రంగా అవతరించిందని, ప్రజల ఆత్మగౌరవాన్ని కాపాడారని తెలిపారు. మహాత్మా గాంధీ దేశానికి స్వాతంత్ర్యం సాధించినట్లే, కేసీఆర్ తెలంగాణను సాధించారని, అందుకే ఆయనను "తెలంగాణ గాంధీ"గా ప్రజలు భావిస్తున్నారని పేర్కొన్నారు.

తెలంగాణ ఉద్యమ సమయంలో కేసీఆర్ చూపిన సంకల్పం, త్యాగం, నాయకత్వం చిరస్మరణీయమని జీవన్ రెడ్డి అన్నారు. రాష్ట్రం ఏర్పడిన తర్వాత రైతుబంధు, రైతుబీమా, కల్యాణలక్ష్మి, షాదీ ముబారక్, ఆసరా పెన్షన్లు వంటి సంక్షేమ పథకాలతో పాటు మిషన్ భగీరథ, మిషన్ కాకతీయ, 24 గంటల ఉచిత విద్యుత్, సాగునీటి ప్రాజెక్టులతో తెలంగాణను ఆదర్శ రాష్ట్రంగా తీర్చిదిద్దారని తెలిపారు.

ప్రస్తుత కాంగ్రెస్ ప్రభుత్వం ఎన్నికల హామీల అమలులో విఫలమైందని, ప్రజల్లో అసంతృప్తి ఉందని జీవన్ రెడ్డి విమర్శించారు. తెలంగాణ అభివృద్ధి, సంక్షేమం, ఆత్మగౌరవ పరిరక్షణ కోసం మరోసారి బీఆర్ఎస్ ప్రభుత్వానికే ప్రజలు అవకాశం కల్పిస్తారని, రానున్న ఎన్నికల్లో బీఆర్ఎస్ ఘన విజయం సాధించి కేసీఆర్ మూడోసారి ముఖ్యమంత్రి అవుతారని ఆయన ధీమా వ్యక్తం చేశారు.