రేవంత్ రెడ్డి అంబేడ్కర్ వ్యతిరేకి: కవిత

ది యునైటెడ్ ఫోరం ఫర్ ఎస్సీ, ఎస్టీ ఎంప్లాయిస్ ఆధ్వర్యంలో సోమవారం అర్ధరాత్రి ట్యాంక్ బండ్ వద్ద నిర్వహించిన అంబేడ్కర్ జయంతి వేడుకల్లో పాల్గొన్న కవిత, ముఖ్యమంత్రికి పేదలకు న్యాయం చేసే బుద్ధి రావాలని ఆకాంక్షించారు. అంబేడ్కర్ ఒక వ్యక్తి మాత్రమే కాదని, ఆయన ఒక సిద్ధాంతమని, మహిళల అభివృద్ధికి ఆయన ఎంతో కృషి చేశారని గుర్తు చేశారు.

తెలంగాణ రాష్ట్ర ఏర్పాటు అంబేడ్కర్ భిక్ష అని, రాజ్యాంగంలోని ఆర్టికల్ 3 లేకపోతే రాష్ట్ర ఏర్పాటు సాధ్యమయ్యేది కాదని కవిత తెలిపారు. అంబేడ్కర్ సోషలిజం వర్ధిల్లాలని ఆకాంక్షించినా, తెలంగాణలో ఆ పరిస్థితి కరువైందని ఆమె అభిప్రాయపడ్డారు. రాష్ట్రం ఏర్పడి 12 ఏళ్లు గడుస్తున్నా దళితులు, మహిళలపై దాడులు పెరిగిపోవడం ఆందోళనకరమని ఆమె పేర్కొన్నారు.

ఏ ప్రాజెక్ట్ కట్టినా దళితులకు చెందిన అసైన్డ్ భూములను ప్రభుత్వాలు లాక్కుంటున్నాయని, వెలుగుమట్లలో, పరిగిలో కూడా ఇదే జరిగిందని కవిత ఆవేదన వ్యక్తం చేశారు. బాబా సాహెబ్ ఇచ్చిన ధైర్యంతో పేదల పక్షాన ఈ ప్రభుత్వంపై పోరాటం చేస్తామని ఆమె తెలిపారు. అంబేడ్కర్ స్ఫూర్తితో ప్రజల కష్టాలు తొలగిపోవాలని ఆకాంక్షించారు.

నల్లమల సహజ సంపదను కొల్లగొట్టేందుకు కేంద్ర, రాష్ట్ర ప్రభుత్వాలు చెంచులను బలి చేస్తున్నాయని కవిత ఆగ్రహం వ్యక్తం చేశారు. కడిచింతలపైలు, సార్లపల్లి చెంచు పెంటల్లో 200లకు పైగా చెంచు కుటుంబాలను బలవంతంగా తరలించేందుకు ఒత్తిడి చేస్తున్నారని ఆరోపించారు. చెంచులను అడవికి దూరం చేసే ప్రయత్నాలు మానుకోవాలని కేంద్ర, రాష్ట్ర ప్రభుత్వాలను హెచ్చరించారు. లేదంటే జాగృతి తరఫున పోరాటం చేస్తామని హెచ్చరించారు.