సెన్సస్–2027: కామారెడ్డిలో అధికారులకు శిక్షణ ప్రారంభం

ప్రిన్సిపల్ సెన్సస్ ఆఫీసర్ మరియు జిల్లా కలెక్టర్ ఆశిష్ సాంగ్వాన్ ఐఏఎస్ ఆదేశాల మేరకు, కలెక్టరేట్ సమావేశ మందిరంలో అదనపు కలెక్టర్ విక్టర్ అధ్యక్షతన ఈ శిక్షణ జరిగింది. సెన్సస్–2027 దశ–1 గృహ జాబితా, గృహ గణన (HLO) కార్యక్రమ నిర్వహణపై శిక్షణ అందించారు.

తెలంగాణ సెన్సస్ ఆపరేషన్స్ డైరెక్టరేట్ సూచనల ప్రకారం, రాష్ట్రవ్యాప్తంగా గృహ జాబితా, గృహ గణన ప్రక్రియ 2026 మే 11 నుంచి ప్రారంభం కానుంది. దీనికి ముందుగా, జిల్లా, ఉపజిల్లా స్థాయి అధికారులు, ఛార్జ్ అధికారులు, ఛార్జ్ క్లర్కులు, టెక్నికల్ అసిస్టెంట్లు, ఫీల్డ్ ట్రైనర్లకు ముందస్తు శిక్షణ ఇవ్వబడుతోంది.

కామారెడ్డి జిల్లాలో ఈ లెవల్–1 శిక్షణా కార్యక్రమం మార్చి 24 నుంచి 26 వరకు మూడు రోజులపాటు ఐడిఒసి (IDOC) సమావేశ మందిరంలో ఉదయం 9:30 నుంచి సాయంత్రం 6:00 గంటల వరకు కొనసాగుతుంది. జిల్లాలోని అన్ని మండలాలు, మున్సిపాలిటీలకు చెందిన సంబంధిత సిబ్బంది ఈ శిక్షణలో పాల్గొంటున్నారు.

సెన్సస్–2027 పనులను సమర్థవంతంగా నిర్వహించడానికి ఈ శిక్షణ అత్యంత కీలకమని అధికారులు తెలిపారు. ఈ కార్యక్రమం ద్వారా, సెన్సస్ ప్రక్రియలో పాల్గొనే సిబ్బందికి అవసరమైన మార్గదర్శకాలు, సాంకేతిక పరిజ్ఞానం అందించబడుతుంది.